Buis ti daga iti Vigan City, maipangato inton 2009

VIGAN CITY – Saganaan dagiti residente ditoy ti dakdakkel a bayadanda iti buis dagiti real properties inton umay a tawen kas resulta iti pannakaipangato ti  baluasion ti daga ditoy siudad.

Kinuna ni Vice Mayor Franz Ranches a maysa ti panagbuisan ken ti pannakapapigsa dagiti economic enterprises ti siudad ti sirsirigen ti konseho ditoy tapno manayonan ti pamastrekan ti siudad  gapu iti bumasbassit a bingayna iti internal revenue allotment agsipud ta adu manen dagiti naaprobaran a kabarbaro a siudad iti pagilian.

“Ipingpingetmi ita (nga ikonkonsentreyt) ti panagur-or iti income, saan laeng a through taxation no di pay babaen dagiti economic enterprises ti siudad,” kinuna ni Vice Mayor Franz Ranches bayat ti   programana a Konseho ti Vigan itay nabiit.

Naammuan nga adda 16 a kabarbaro a siudad a makibinningay iti IRA a mailatang kadagiti amin a siudad.

Kinuna ni Ranches a naantisipar ti siudad ti Vigan nga adda reduction iti IRA isu a nababa ti projectionna iti budget.

Kinuna pay a pinaayaban ti konseho dagiti pangulo dagiti economic enterprises ti siudad kas iti Playa de Oro Resort, tiendaan, slaughter house, parking terminal ken dadduma pay tapno pagtitinnulonganda a papigsaen pay dagitoy babaen ti lehislasion.

Segun iti bise mayor, sabali pay nga inrugida ti deliberasionna ken manamnama a maaprobaran ti gakat mainaig iti rebision iti valuation rates dagiti real property taxes iti Vigan City.

Kinuna ni Ranches a nangatngato pay ti rate dagiti dadduma a munisipio idinto nga innayonna a “daytoy ti ar-aramidenmi ita a makatulongto iti panagur-or iti additional income para iti gobierno ti siudad.”

Kabayatanna, kinuna ni Konsehal George Villanueva, pangulo ti committee on revenues, nga idi 1998 pay laeng ti naudi a rebision ti baluasion ti real property ket nababbaba nga adayo ti balor ti daga iti Vigan ngem dagiti kaarrubana a munisipio kas iti Bantay, Caoayan, Sta. Catalina ken San Vicente idinto a maysa a siudad ti Vigan.

“Idi 2001, saan met a nairaman agsipud ta nagbalin metten a siudad,” kinuna ni Villanueva sana innayon nga iti panagbalinna a siudad, nailanad iti charterna ti 5 a tawen a moratorium.

Kinunana pay a 50% increase iti land valuation ti ineskediul ti city assessor office’s ngem adda dagiti simmupiat ket sinurot ti konseho ti probiso iti local government code a 30% ti increase iti pateg ti daga iti siudad.

Nupay kasta, kinuna ni Villanueva nga agepekto pay laeng ti ordinansa inton 2009.

“Adda met obligasiontayo… iti sabali a bangir, mabenepisiaran met dagiti adda sanikuana ditoy, nanginngina met ti pangrugiananna,” inyunay-unay ni Villanueva sana innayon nga “aniaman a pagbayadtayo, agsublinto a maaramat para iti panagdur-as ti Vigan.”#