: BUKANEGAN: MAESTRA A MAPAN MANGGED DIAY JAPAN (Maikadua a Paset) | Tawid News Magazine - Weekly Ilocos News 📰

BUKANEGAN: MAESTRA A MAPAN MANGGED DIAY JAPAN (Maikadua a Paset)

MANGITURTURONG:

Dayta man ngarud, kakailian, intay nangngegan

Ti damo a dupag dagiti dua nga agkasalisalan
Ni babai, ti panggep inna  ngarud lapdan ken ublagen
Kaykayatna a ti naindaklan a maestra agserbi laengen
Iti pagilian, tapno agtultuloy ti intay panagdur-asen

Ni lalaki sige, mapanka, kunana man
Ta dayta  kano ket karbenganna piman
Iti panangtuntonna iti gasatna iti naraber a pagaraban
Ta no ikumpara iti sueldona  a kas maestran
Ad-adu nga amang iti Japan inna mabirokan
Imbagana a ti panagbaketna ket nasken a saganaan
Iti Japan ngarud ti solusion ti parikutnan

Ngarud gagayyemi intay ngarud ayabanen
Ti nalibnos a prinsesa ti bukanegan patakderenen
Denggen ti nayon ti kapanunotan ken irasrasonna
Ala ngarud, prinsesa ti bukanegan tumakderka
Batangmo manen ti sumao ken agdepensa
Gagayyem ken kakabsatko iti tallaong
Pasabatantayo man iti palakpak a natibong!

BABAI

Ti mannursuro ti kaindaklanan amin a propesion
Awan ti makatukad dayta isu a ti Japan ket bay-amon
Lalo ket entertainer pay iti sumrekam a makarimon
Nababa unay ken di maikari kenka dayta nga arapaapmon

Ania pay la ti sapulem iti pagsapulam
Mararaemka iti gimong ta maysaka ngarud a madam
Kadagiti adalam inton propesionalda met a kas kenka
Malaglagipdakanto a kanayon gapu iti panangtarabaymo kadakuada
Dakkel la unay a banag dayta a pakaragpatan
Iti pannakapnek wenno total fulfillment a kunadan

LALAKI

Ti pannakapnek a kunam iti  bukod a bagi
Ket pannakaragpat ti ambision a sibaballigi
Ket no dina nasarakan dayta iti panangisursurona
Apay ketdin a lapdan nga agagawa

BABAI

Diak laplapdan, ibagbagak laeng umno nga aramidenna
Ti panagbalinna a Japayuki di maikari kenkuana
Amangan no dayta pay ti pakaisagmakanna
Lalo no daytoy ket makagargari iti innanto panagsala
Ti sulisog ken pannakaisagmak addanton kenkuana

LALAKI

Uray sadino ti yanmo adda latta ti peggad iti sibaymo
Uray matmaturogka no nabangungotka ultimonan ti biagmo
Ti kinarang-ay nga ing-ingpen ket nasken nga inna sapulen
No iti trabaho iti agdama ket di makita, nasken ngarud  sapulenen
Ti panagabrod ket maysa dayta a solusionen
Isu a dikan agpampamayan inka ket tukmaanen!

Dagiti laeng natured a tattao ti agballigi iti ambisionna
Kadagiti saan, agan-anusda lattan no ania ti adda kadakuada
Amintayo ket ambisionanna ti bumaknang
No makasarak sadiay Japan iti milionario a sakang
Di pay ket isuna met ti mairanud iti kinabaknang
Uray no dinto agtrabaho no isu ti kayatnan
Ta  baknangton ken awanen ti inna pakarikutan
Isu nga ayonak la unay ti  inna panag-Japan
Ta dakdakkel ti oportunidad dita nga agdidiaya
Isu a palubosanen ita ta adda pay ti pingetna

BABAI

Saan amin nga ag-Japan ket nagballigi
Adu met dagiti naidadanes a babbai
Isu dayta ti saanko nga ayonan ken innak man agmadi
Dika koma mangnamnama iti panggedan a sabali
No iti pagilian ket adda kenkuanan a mangnibinibi

Ti panagrang-ay ket saan a magun-od iti agpatnag
No di ket pagbannogan ken nasken ti panagsalukag
Ti kultura ni Ilokano ket unayen a nasnaslag
Ta naridam ken nagaget agtrabaho pay iti sellag
Ti kinaridam ken kinagaget a kultura nga  ibagbagak
Awan ti makaabak uray asino a puli a kunak
Ta uray no sadino a lugar ti yanmo dumtengto ti irarang-aymo
Gapu dayta a kultura ti kinaridam ken kinagagetmo

Isu nga idiamon dayta  a panag-Japan
Ti dayaw ni Filipina inna pay unay ibaban
Dayta laengen Japayuki a nagan ket unaynan
Nagalas a denggen lalona kadakami a kababaian
Katukadna ti panaglako iti ragsak iti salonan
Saan a kasta ti naemma nga Ilokanan

LALAKI

Nupay nababa unay ti Japayuki iti inda panagkitkita
Maibilangda a bannuar iti  pagilian iti agdama
Ta isuda nga overseas contract worker agipatulodda iti kuarta
Adu a kuarta ti ipastrekda iti pagilian ket pimmigsa ti ekonomia
Isu a dimo magatadan dayta a gapuanan ken aramidda

BABAI

Ti kayatmo a sawen, kabaddungalan inka ayonan
Ti pannakaibaba la  unay ti kinababai ti Ilokanan
Dimo ammo ti sasawem amangan no agam-ammangawkan
Saan nga aramid ni Ilokana dayta a pagtrabahuan!

LALAKI

Nasken a sanguenen ti kinapudno
Ti panaginmimikki ita ket saanen nga  uso
Ti nasken ket adda umdas nga ipaunegmo
Igatangmo iti badom ken pagardiodmo
Matulongam pay dagiti kakabsat ken dadakkelmo
Isu dayta ti importante a bunga ti ambisionmo
Isu a tuntonen ta isu ngarud ti kayatmo!
        (Adda tuloyna)