BUKANEGAN: MAESTRA A MAPAN MANGGED DIAY JAPAN (Umuna a Paset)

DAGITI AGAKEM:

MANGITURTURONG

PRINSESA TI BUKANEGAN

PRINSEPE TI BUKANEGAN

INTRO: Ilocano Song

MANGITURTURONG:

Sakbay man iti amin, kablaawandakayo

Iti naimbag a kanito wenno orasyo

Dakayo amin nga immay timmallaong

Kadaytoy bukanegan a nailungalong.

Ti tema nga  inda pagdebatean: no rumbeng wenno saan

A ti anak a maestra, sumrek nga entertainer sadiay Japan

Ta  piman, bassit kano met laeng ti sueldona ditoy pagilian.

Ngem dagiti dadakkelna, iti panggepna dida umayon

Ta maestra la ngaruden, apay nga agabrod pay laeng

Iti Japan, saan pay laeng a nakasigurado

No makasarak iti Yakusa a barumbado

Biagnan ti naladingit ken naikulbo.

Ngem agpilit ti anak, ket agpatuloy latta iti panggepna

Mangnamnama a sadiay Japan dakkel a pirak ti mabirokna

Inton aggawid, dakkelto la ketdi a nam-ayna.

Rumbeng kadi a palubosan toy anak a nagkalikagum

Wenno ipapilit a daytoy ket agisuron

Denggen ngarud ti kalintegan dagiti bumubukanegan

Intay man ngarud ida pasabatan natibong a palakpakan!

Ti prinsesa ti bukanegan iti (nagan ti ili)

Isu daytoy ni (nagan ti speaker a babai) awanen sabali

Isu ti mangikalintegan a saan a rumbeng nga agabrod

Ni prinsipe ti bukanegan iti (nagan ti ili)

Ti mangikalintegan a rumbeng ti maestra agabrod kano

Isu ngarud ti mangngegan a maibuksilan

Ala  ngarud patgek a babai a kaindaklanan

Tumakderka ket inkan pakayabkaban

Ti lalaki iti bukanegan kadagiti kapanunotam

Tapno dumdumngeg indakanto husgaan!

 

BABAI:

Saanko nga ayonan dayta a panggep ni madam

Lalo a diak ayonan, ti adalna kadagiti ubbing inna ipaidam

Isu nga ublagek a taltalaga iti inna panag-Japan

Idtoy laengen pagilian ta mannursuro ket aramid a kaindaklanan

Iti ballasiw-taaw amangan no maisagmak pay iti kalokoan

Isu daytoy ti innak ikalintegan, ngarud, kasalisalko tumakderkan!

LALAKI:

No siak ket ayonak ti panggep ti maestra

Ti sapulen a kuarta sadiay maminpulo nga ad-adu dayta

Ti sueldona ditoy, ay, barya laeng a makunkuna

Isu a karbenganna met ti agsapul iti naraber a pagaraban

Lalo ita ta ubing pay ken inna kapigpigsaan

Ta  no inton baketen, panagbiagna  dinton marigatan

Ta adunton ti urnongna a makuna nga inna pagsadagan.

                                  (Adda tuloyna)