Footer

Bukas-kotse gang, nanabtuog iti nagkadua nga operasion ti polis

VIGAN CITY – Ibilang ti polis ditoy a naluspaken ti grupo dagiti agluklukat iti kotse tapno takawanda kalpasan ti pannakatiliw dagiti tallo a suspetsa babaen ti insayangkatda nga operasion itay nabiit.

Adda ita iti kustodia ti polis ditoy da Vladimir Olivas, 21, naasawaan, residente iti Nagsabaran, San Juan ken Barangay III ditoy; Rodel Tubera, ken Joseph Monson, 19, baro, agpada a residente iti Barangay IV iti daytoy met a siudad. Masuspetsa dagiti tallo a nagisayangkat iti panaglukat iti dua a kotse sada kinasakas dagiti napapateg a ramramit ti lugan ken ospital.

Kinuna ni hepe ti polis ditoy P/Supt. Maximo Torricer a di pay nabayag ti operasion dagiti suspetsa ta nabiit pay a naggapu iti Hawaii ni Olivas, ti mapapati nga utek ti grupo.

Innayonna a birbiroken ita ti polis ti sabali pay a kadua dagiti suspetsa, maysa nga agnagan iti Ernesto Favis.

Sakbayna, naaresto da Olivas ken Tubera iti search operation nga inwayat ti nagtipon a bunggoy ti San Juan PNP nga indauluan ni COP Benjie Tremor ken Vigan PNP nga indauluan ni Torricer  a nakakumpiskaanda iti tallo a narolio a marihuana.

Iti follow-up operation ti nasao met laeng a grupo iti pagnaedan ni Monson, nakakumpiskada iti dua a bag a naglaon kadagiti surgical kit, stethoscope, car stereo ken speaker.

Mapapati a natakaw dagitoy a ramramit iti kotse da Dr. Martin Baclay ken Dr. Brigida de Leon.

Naluktan ti kotse ni Baclay bayat ti pannakaiparkna iti Del Pilar St., ditoy siudad ket nakasakas dagiti surgical instruments ken stethoscope nga adda iti uneg ti lugan.

Natakaw met ti car stereo ken speaker iti naluktan a kotse ni de Leon bayat ti kaadda ti luganna iti sanguanan ti La Mirada.

Kinuna ni Torricer a maisagsaganan ti kaso maikontra kadagiti tallo a suspetsa.

Daytoy ti umuna a dua a kaso ti panaglukat iti kotse tapno matakawan ditoy a siudad.#