Bukatot

(Ababa a sarita para ubbing)

Ni Leamor A. Molina

Silag, Sta. Maria, Ilocos Sur

He, he, he, inatiwko manen ni Dan,” ikatkatawa ni Jimboy iti unegna kabayatan a karkargaanna iti sida ti pingganna. “Nagkapoy ngamin a dumarup. Saanto pay la nakadanun iti lamisaan a nakaidasaran dagiti sidaen, naibuskon ti taraon iti platok ken agsubliak manen a makipila.”

Kasta ni Jimboy tunggal pasken nga atendaranda iti gayyemna. Alisto a makaala ti kanenna. Saan a masipsiputan no sadino ti sumulsulputanna. Awan bibiangna uray no agluplupiasen iti taraon iti platona. Sabalinto pay ti iyawidna.

Sobra-sobra manen ti innala tay kunkunakon a bukatot,” kinuna tay maysa a kaarrubada nga immatendar met iti dayta a pasken.

Isu ngarud, di la mabain,”pasarunson met ti sabali pay a kaarrubada idinto a kinusilapanna ni Jimboy nga agisaksakmol iti keyk a kunam no maibusan.

Idi nagawid ni Jimboy, adda pay bitbitna a sangasupot a nadumaduma a klase a makan. Idi simmangpet iti balayda, inalistuanna nga inkabil ti taraon iti lakasana.

Ditoyko nga ilemmeng tapno saan a makita dagiti tallo a kakabsatko, he he he,” kinunana iti nakemna. “Kanekto no madamdama ti kaguddua; ti mabati a kaguddua isunto ti pagbibingayanmi nga agkakabsat inton sumangpetda.”

Maymaysa ni Jimboy iti balayda iti dayta a kanito ta napan nagbasa dagiti kakabsatna. Napan met nakigapas dagiti dadakkelna. Naglangan ni Jimboy iti klasena gapu iti pasken nga inatenderanda iti gayyemna.

Nagwab ket inyinatna ti dua nga imana sana inyilad iti sopa sabay apros iti nagtimburog a tianna. Nagkidem ta umapay ni ridep.

Tik tak! Tik tik tak!

Adda nagtedted iti rupana a dina ammo a banag nga aggapo iti kisame ngem saanna a pinansin.

Whoooosh”! Bigla nga immadu ti agtedted ket nabbasa ti rupana. Bimmaringkuas. Lumabbasit a danum! Maris-tsokolate!

Timmakder ket napan nangala iti pagsukatanna iti nakadayday a lupot a linabaan ni nanangna. Kellaat, adda nagtinnag iti sanguananna a tinapay.

Uy, sayang; nagsayaaten ta agtinnag ti grasia!” kinunana sa timmangad iti langit. Idi pidutenna ti tinapay, nagdadarandan metten dagiti tinapay nga agtinnag.

Kastoy koma a kanayon ta saanen a problema ti igatang. Mabsogak pay a kanayon,” maragragsakan a kinunana. Indawatna nga adda koma nayonna a ham ken cheese ta saan a napnek iti tinapay laeng.

Mangala koma iti planggana a pangikabilanna kadagiti tinapay a pinidutna ngem addaytan nga agtinnag ti ham, hotdog, longganisa, tosino, burger ken dadduma pay a paboritona a makan.

Wow!” napanganga iti naimatanganna. Saannan nga ammo no ania ti pidutenna. Nagtugaw iti rabaw ti papag iti abay ti balayda ket ti la agisakmolen ti inubrana. Pidut, sakmol, pidut, sakmol, pidut, sakmol. Naltotan la ket ngarud.

Masapulko ti strawberry juice,” naipukkawna.

Pagammuan ta napardas a naggayus ti nalabbaga a danum nga aggapo iti waig iti sanguanan ti balayda. Strawberry juice nga agpayso!

Agsobsobra daytoyen a parabur kaniak,” nakunana. Ngem nakigtot idi maiyanud metten ken kasla lumba-lumba a tumtumpaw iti strawberry juice.

Kaslaak met la addan iti taaw! Puro metten nalabbaga a danum ti makitak!” nakunana.

Kalpasan ti sumagmamano pay a minuto, nariknana a lumamlamiis ti juice. Madamdama, agkutimermeren ni Jimboy gapu iti kinalamiisna.

Kellaat a nagdalluyon ti nalabbaga a danum ket naiyanud ni Jimboy. Mangrugin nga agbuteng ken agsangiten idi asidegen a maidungpar iti dakkel nga ice cream. Sannan nga ammo ti aramidenna. Nagkayaw-at nga umadayo ngem saan a makakunail agsipud ta bimsog ti tianna iti kaadu ti kinnanna. Naglagaw ta alun-onenen ti ice cream.

Nanangko! Hu! Hu! Hu!” Saannnnnnnnn!” inyikkisna idinto nga insarapana ti imana tapno saan nga igupen ti alinuno. “Saan, saan, saan!” pimmigsa ti laawna.

Jimboy! Jimboy! nakangeg iti napigsa a boses sa nariknana ti napigsa a pannakagunggon ti abagana. Nagmulagat. Ni manongna ken dua pay a kabsatna. Kasangsangpetda manipud eskuelaanda.

Kasla agpaypayso,” umanges-anges a kinunana. Kasla napakapsutan a bimmangon.

Ania nga agpaypayso, ading?” dinamag ni manongna.

A-a-awan, manong,” insungbatna. Ngem nabayag a pinulpulingling ti panunotna ti natagtagainepna. Paltiing la ketdi daydiay kenkuana!

Madamdama, timmakder. “Aguraykayo dita ta adda mapanko alaen,” kinunana.

Simrek iti kuarto. Idi rummuar, bagkatna aminen dagiti indulinna a makan. Indasarna tapno pagraranudanda nga agkakabsat.

Bayat ti pannanganda, nagkari ni Jimboy a saanton nga arkos dagiti puonsionan ken dinanton papaidaman dagiti kakasabsatna no adda makan nga isangpetna.#