Bumallasiw a lakay, dinungpar ti motorsiklo

CANDON CITY – Dinungpar ti motorsiklo ti maysa a lakay iti Barangay San Juan ditoy siudad itay lawasna.

Segun iti report, bimmallasiw ti biktima a managan Pablico Andres, 60, residente iti nadakamat a barangay idi dungparen ti Honda TMX 155, addaan plaka ZZ-8260, minaneho ni Virgilio Aglibut, Jr. residente iti Lintic, Banayoyo, Ilocos Sur.

Nasugatan ti ulo ti biktima idinto a nagsagrap iti dunor ti drayber agraman ti insakayna a managan Jose Aglibut gapu iti pannakakuyasyas ti motorsikloda ket naitarayda iti ospital para iti pannakaagasda.#