Bumarangay, naggamak naakaranda rabies

BANTAY, Ilocos Sur – Nagtignay ti gobierno munisipal ditoy a gimmatang iti anti-rabies vaccines para kadagiti residente iti maysa a barangay ditoy nga ili a sineknan ti amak gapu iti exposureda iti kalugaranda a kinagat ti agballa nga aso.

Kinuna ni Mayor Sammy Parilla nga agtultuloy iti panangitedda iti anti-rabies vaccines kadagiti agindeg iti Barangay San Julian nangruna dagiti nakalagudlagod dagiti   biktima.

Nagdadarupdop dagiti residente iti Barangay San Julian West ditoy nga ili a nagpaindiekson iti municipal health center gapu iti amakda a naakaranda iti rabies kalpasan a natay ti kalugaranda a barangay tanod a kinagat ti agballa nga aso.

Segun met ken ni Dr. Pablo Quedado, addan 64 nga agindeg iti nadakamat a barangay iti Bantay ken 7 iti Sta. Maria a nagpabakuna iti kontra rabies iti Gabriela Silang General Hospital.

Naammuan nga uppat a tattao ti kinagat ti agballa nga aso iti Santa Maria, Ilocos Sur a pakairamanan ni Barangay Kagawad Roberto de Peralta a natay idi Disiembre 22.

Idi naggawid ti biktima, nagparang dagiti seniales ti rabies kenkuana ket mapapati a maysa kadagiti nakagatna ti kabsatna a ni Marites ket nayospital daytoy idi Disiembre 29 iti Lahoz Clinic and Hospital sa naiyalis iti GSGH a pakapalpaliiwanna no naakaran iti rabies.

Ditoy metten a nagamak dagiti kabarangayan dagiti biktima a nakalagudlagodda a naakaranda iti rabies isu a nagdadarisonda a nagpaindiekson iti kontra rabies.

Segun ken ni Dr. Pablo Quedado, prioridadna a maindieksonan dagiti nagsida iti agballa nga aso agraman dagiti nagparti.#

Kinunana a maiyakar ti rabies babaen ti tupra, dara ken katay ti naapektaran.#