Bumbay, pinaltogan riding in tandem

MAGSINGAL, Ilocos Sur – Kitkitaen dagiti polis no adda pakainaigan iti negosio ti pannakapaltog ti maysa a bumbay sadiay Barangay Alangan ditoy nga ili idi Septiembre 19.

Maysa a saan a kumpirmado a report ti limtuad nga adda mapapati a nainget a kumpitensia iti negosio dagiti bumbay ket adda lugar a maibilang a baluarte tunggal maysa a saan a mapalubosan a sumrekan ti sabali a grupo tapno agnegosio.

Karaman ti negosio dagiti bumbay ti panagpautangda iti kuarta,  plastik a drawer, payong, radio, tolda, kaserola, gas stove ken dadduma pay nga alikamen nga inaldaw a tultulodan dagiti immutang.

Kabayatanna, segun iti doktor iti Metro Vigan Cooperative Hospital, Bantay, Ilocos Sur a nangtaming iti bumbay, nalasaten ni Mohinder Singh, 58, naasawaan, Indian national ken residente iti Zone 3, Bantay, Ilocos Sur ti peggad.

Malaksid iti sugatna iti makannawan a takiagna gapu iti pannakapaltogna, mapapati a namalo pay ni Singh iti kayo sakbay nga intaray dagiti mannanakaw ti kuarta a koleksionna.

Iti inisial nga inbestigasion dagiti polis ditoy, agdaldaliasat ni Singh nga agpadaya, nakalugan iti XRM a motorsiklona idi agaup 12:50 ti malem ti nadakamat a petsa  ket iti nagkurbaan ti Barangay Alangan, kellaat a nagparang iti likudanna dagiti suspek a naglugan iti motorsiklo sada pinaltogan ti biktima a puon ti pannakaikrasna.

Mapapati a dimsaag dagiti suspek sada minalo ni Singh ken innala ti P4,000.00 a koleksionna.

Nakarekobre dagiti nagresponde a polis iti maysa a kapsula ti Cal 5.56mm ken kayo nga agatiddog iti sumurok kumurang 50 pulgada ken 2 pulgada a diametro iti asideg ti nakapasamakan ti pammaltog.

Madama ti panagimbestiga dagiti polis mainaig iti daytoy a pammaltog.#