Buri, mapaadu iti municipal greenhouse

SAN JUAN, Ilocos Sur – Mapatubo ken mapadakkel dagiti nadumaduma a seedlings iti municipal greenhouse tapno adda pagtaudan iti imula para iti tree planting ken clean and green program ti munisipio, segun iti ama ti ili ditoy

Kinuna ni Mayor Benjamin Sarmiento a karaman ti buri kadagiti kangrunaan a mapatubo ken mapaadu iti municipal greenhouse a masarakan iti Barangay Barbar ditoy nga ili a naluktan idi agtapos ti Hulio daytoy a tawen.

Ti buri wenno silag ti one-town-one-product (OTOP) ti San Juan.

Nalatak ti San Juan a pagtataudan dagiti produkto manipud iti buri a kas iti ikamen, bag, basket ken dadduma pay a linaga a produkto.

Ti Buri Festival ti tampok a pabuya daytoy nga ili iti tinawen a panangselebrarna iti panagpiesta.#