Bus, motorsiklo, nagdinnungpar, 1 natay

TAGUDIN, Ilocos Sur – Natay ti maysa a motorista idinto a nasugatan ti kinalubbonna idi nakidinnungpar ti naglugananda iti maysa a bus iti pagkurbaan ti national highway ti Barangay Las-ud, ditoy nga ili idi agarup 11:45 ti rabii ti Disiembre 12.

Natayen idi maidanon iti Tagudin General Hospital and Capillariasis Center ni Jefferson Sibayan y Parrocha, 24, baro, ken residente iti Barangay Concepcion, Rosario, La Union. Naiyalis met manipud iti daytoy nga ospital iti di nadakamat nga ospital iti La Union ti kinaluganna a ni Arias Cyril y Balacang, 26, baro, ken residente iti Lingayen, Pangasinan gapu kadagiti grabe dagiti sugatna.

Segun iti inbestigasion, obertekan koma ni Sibayan ti maysa a motorsiklo iti nadakamat a pagkurbaan iti Barangay Las-ud ngem mapapati a kimmaut iti bangir a linia ti nakasabatda a Maria de Leon bus a nagtungpal iti panagdinnungparda.

Nakaro a nadadael ti motorsiklo gapu iti impact ti panagdinnungparda iti bus.#