Bus, motorsiklo, nagdinnungpar; 2 natay

STO. DOMINGO, Ilocos Sur – Nagudas ti nagmaneho agraman ti kasakayna idi nakadinnungparna ti maysa a bus iti national highway a sakup ti Barangay Poblacion ditoy nga ili idi bigat ti Septiembre 4.

Dagus a natay da Robert Molina y Valenzuela, 26, naasawaan, mannalon, ken residente iti Barangay Manzante, Magsingal, Ilocos Sur; ken ti kasakayna a ni Jackson Quines y Palor, 22, baro, college graduate, ken residente iti Barangay Cabaroan, Magsingal, Ilocos Sur gapu kadagiti grabe a sugat a sinagrapda kalpasan a nakadungparda ti GMW Trans Bus idi agarup 2:50 ti bigat ti nadakamat a petsa.

Iti report manipud iti polis ti Magsingal, agpaabagatan a direksion ti GMW Trans a minaneho ni Glenn Patrick Burgos y Agarpao, 33, naasawaan, ken residente iti Bangan, Sanches Mira, Cagayan, ket idi makadanon iti Barangay Poblacion, aksidente a nakidinnungpar iti Kawasaki Rouser 125 a minaneho ni Molina a mapapati a nataray ken kimmaut iti linia ti bus.

Gapu iti pigsa ti panagdinnungpar, nagsagrap dagiti biktima kadagiti nakaro a dunor a nakaigapuan iti dagus nga ipapatayda.

Total a nadadael ti motorsiklo idinto a nagsagrap met iti pannakadadael ti bus.

Kabayatanna, dinungpar ti maysa a kotse ti poste ti silaw ken waiting shed sadiay Barangay Taleb, Bantay, Ilocos Sur idi bigat ti Septiembre 1 a puon ti nakadunoran dagiti naglugan.

Naitaray iti ospital da Christopher Jayson Paggao y Gerardo, 29, seaman, nagmaneho iti Mitsubishi Montero Sport GLS; ti asawana a ni Maribeth Lyn, 28, ti anakna a ni Prince CJ, 3, ken innem pay a pasahero a nainaganan Eufrosino Baclig y Baclig, 67; Lilibeth Agabao Baclig, 39, agpada a residente iti Turod Patac Cabugao; April Somera y Agagbao, 23; Ariel Pagdilao y Agabao, 23; Faitylou Ubaldo y Cortez, 24; Marcelino Ubaldo y Sunio, 64, residenteda amin iti Labut East Lipit, Cabugao, Ilocos Sur.

Mapapati a nakatuglep ni Christopher Jayson Paggao y Gerardo, 29, seaman, ket nakabigna ti manibela iti abagatan nga abaga ti kalsada a nakadungparanna iti street light ken waiting shed.

Rimmuar met laeng dagiti pasahero iti dayta a rabii malaksid ti asawa ti drayber a nakarikna iti pannakaulaw isu a maipaayan iti obserbasion.#