Bus, motorsiklo nagdinnungpar, 2 natay

CANDON CITY – Dua a lalaki ti natay idi nakidinnungpar ti motorsikloda iti maysa a bus iti katengngaan ti rangtay iti barangay Balingaoan ditoy siudad idi sardam ti Nobiembre 6.

Naideklara nga awanen ti biag da Jeorge Jude Eleccion y Dario, 43, naasawaan, ken Aurelio Trinidad y Elaydo, 44, naasawaan, agpada a residente ti Barangay Cappa-cappa, San Esteban idi maidanonda iti St. Martin de Porres Hospital ditoy siudad.

Boluntario a simmuko iti polis iti Santiago, Ilocos Sur ti driver ti bus a ni Jose Gutierrez y Dalit, 28, naasawaan, residente iti Barangay Burgos, Moncada, Tarlac , drayber ti Florida bus sa naipaima iti polis ti Candon City.

Segun ken ni Gutierrez, awan ti silaw ti agpaabagatan a Honda Wave a motorsiklo a sinakayan dagiti biktima ket iti katengngaan ti rangtay Bucong, ginandatda a labsan ti sinarunoda a sabali a motorsiklo ngem kimmautda iti makannigid a lane a puon ti nakidinnungparan ti luganda iti agpaamianan a bus.#