Footer

Bus, nabato

BANTAY, Ilocos Sur – Nabuong ti makinsango a windshield ti maysa a bus gapu iti pannakabatona sadiay Barangay Sagpat ditoy nga ili idi rabii ti Enero 5.

Nagpulong iti polis ni Samuel Pagtama y Pucan, 53, naasawaan, ken residente iti Barangay 18, Magnuang, Batac, Ilocos Norte a binato ti back rider ti maysa a motorista ti Maria de Leon a minanehona bayat nga agtartaray iti national highway a sakup ti Barangay Sagpat idi agarup 11:55 ti rabii ti nadakamat a petsa.

Gapu iti pannakabuong ti windshield iti batog ti drayber, naparsiakan ti rupa daytoy kadagiti nabuong a sarming.

Naglibas dagiti di nabigbig a suspek iti amianan a direksion.#