Bus, van nagdinnungpar, 1 ti natay

BANTAY, Ilocos Sur – Maysa ti natay idinto a nasugatan ti kaduana idi nabalintuag ti luganda sa insagad ti kasabatda a bus iti kalsada nasional a sakup ti Barangay Guimod ditoy nga ili.

Saanen a naidanon ti biag ni Fernando Ong, 50, naasawaan, glassagnaed iti Sampaloc, Manila, iti Metro Vigan Cooperative Hospital a nakaitarayanna kalpasan ti aksidente.

Nagsagrap met iti sugat ti kaduana, ni Andrew Velasco, 18,  taga-Pangasinan, iti sugat iti kannawan a sakana ken garumiad iti nadumaduma a paset ti bagina.

Malaksid iti garumiad gapuanan dagiti naiparsiak a sarming, saan a naan-ano ti drayber, konduktor ken pasahero ti RCJ Bus.

Nakaro a nadadael ti Tamaraw jeep a nagluganan dagiti dua idinto a nakuppil ti sungo ti RCJ bus a minaneho ni Carlito Mateo, 48, naasawaan, taga-Claveria, Cagayan.

Segun ken ni Mateo,  agtartaray ti bus iti abagatan a direksion  idinto nga agpaamianan ti lugan da Ong ket inobertekan ti lugan ni Ong ti motorsiklo iti sanguananna a nakakautanna iti linia ti bus.

“Agtartaray ti luganmi… idi gulpe nga adda nagbaribar a lugan iti sanguananmi ket nagprenoak ngem bale isu pay la ti naibaut kadakami,” insalaysay ni Mateo iti pannakiuman kenkuana ni Peter Rebunal ti DWRS.

Kinuna ni Mateo a timmama ti kaha ti Tamaraw jeep iti sungo ti bus a puon ti nakabuongan ti sarming ti luganna.

Kinunana ni Mateo nga idi natamaan ti bus ti Tamaraw, induronna daytoy ket natumba.

Ngem kinuna ni Velasco nga adda nag-overtake a lugan iti likudan ti RCJ ket daytoy ti linisian ti Tamaraw a puon ti nakakautanna iti linia ti sumungad a bus.

Kinuna ni Velasco nga adu ti tao iti kannawan isu a kinabig ni Ong ti manibela iti linia ti bus.

Naammuan a napan nagideliber da Ong iti glassware iti maysa a sukida iti Sto. Domingo, Ilocos Sur.#