Footer

Butos iti Vigan City, Candon City, 11 nga il-ili, mabaliwan a mabilang

VIGAN CITY – Kas panagtungpal iti pammilin ti Commission on Elections, Manila, inukkon ti provincial election officer dagiti urna a nakaipalaonan dagiti butos manipud dagiti sangapulo ket tallo nga ili ken siudad iti Ilocos Sur a prinotestaan da Gov. Deogracias Victor "DV" Savellano ken ni dati a Bokal Efren Rafanan. Sr., dagiti nagbalubal a kandidato para iti kinagobernador iti eleksion idi Mayo 14 iti daytoy a tawen.

Kinuna ni Provincial Election Supervisor Atty. Joel Gines a maipan dagiti ballot boxes a naglaon kadagiti balota manipud kadagiti naprotestaan a presinto dagiti il-ili ken siudad iti Comelec, Manila para iti pannakabilangda manen.

Kinuna ni Gines a kuyogen dagiti municipal treasurers, municipal election officials nga akinsakup dagiti naprotestaan nga il-ili ken siudad, polis ken dagiti pannakabagi dagiti nagprotesta a kandidato dagiti ballot boxes iti pannakaipanda iti Manila.

Kinuna ni Rafanan iti programana iti radio a nangipila iti complaint idi May 27 ket kalpasan ti hearing, “namati ti Comelec nga adda panagsuitik iti Ilocos Sur ket imbilinna ti recount.”

Iti met immun-una nga interbiona iti media, kinuna ni Savellano a nakasagana iti protesta ni Rafanan ken saan nga apektado ta isu ti nangabak iti eleksion.

Prinotestaan ni naabak a kandidato para gobernador Efren Rafanan, Sr. ti resulta ti eleksion iti tallo nga ili ken dua a siudad iti probinsia a pakaibilangan ti Cabugao, San Vicente ken Narvacan ken ti siudad ti Vigan ken Candon.

Nangipila met ni nangabak a gobernador Deogracias Victor “DV” Savellano iti counter protest iti resulta ti eleksion iti walo nga ili a pakairamanan ti Sinait, San Juan, Magsingal, Sto. Domingo, Sta. Catalina, Sta. Maria, Sta. Cruz, ken Tagudin.

Nangabakan amin ni Rafanan dagiti ili a prinotestaan ni Savellano.

Saan a nairaman a maibiahe dagiti ballot boxes iti Sinait ken Cabugao ta madama ti rebision iti regional trial court gapu ta nagprotesta dagiti naabak a kandidato para mayor ken bise mayor iti Cabugao kasta met ken ni Mayor Edgar Yabes iti Sinait.

Iti resulta ti eleksion idi Mayo 14, nakagun-od ni Savellano iti 132,656 a butos idinto a 131,264 ti butos ni Rafanan wenno iti baet a 1,392 a butos.

Nupay kasta, nasukalan nga adda mapapati a biddut iti pannakadagup ti butos da Savellano ken Rafanan kalpasan a naduktalan ti provincial election office nga ad-adu ti bilang dagiti butos iti  ili ti Sta. Maria ngem dagiti botante nga aktual a nagbutos.

Inannugot met ti municipal election officer ti nasao nga ili a napagsisinnukatda ti butos da Savellano ken Rafanan ngem kinunana nga honest mistake ti napasamak.

Iti panagbilang ti provincial board of canvassers iti Certificate of Canvass ti nasao nga ili, nakagun-od ni Rafanan iti 8,108 a butos idinto a 5,858 a butos ken ni Savellano wenno iti diperensia a 2,250.

Kalpasan ti pannakaduktal iti biddut, nagbalin a 7,030 ti butos ni Rafanan ken 5,810 ti butos ni Savellano iti nasao nga ili wenno iti diperensia a 1,220 a butos.

Nagbalin a 2,422 a butos ti nangabakan ni Savellano ken ni Rafanan iti intero a probinsia.

Kinuna pay ni Gines a ti Comelec, Manila, 1st Division ti mangiwayat iti rebision dagiti butos kadagiti naprotestaan nga il-ili ken siudad.#