Cabugao athletic oval, nakasaganan para provincial meet

CABUGAO, Ilocos Sur – Nakasaganan ti track and field oval a masarakan iti abagatan ti Cabugao South Central School, Barangay Bonifacio para iti provincial meet a maangay ditoy nga ili inton Disiembre 1-5.

Kinuna met ni Cabugao District PESS Coordinator Ronel M. Ubaldo a naiyaplag metten dagiti kabarbaro a rubbermat iti Cabugao Cultural and Sports Complex para iti pannakaangay ditoy ti taekwondo ken gymnastics, kasta met dagiti dadduma pay a pasilidad para iti nasao a paay-ayam.

Sakbay ti provincial meet, naangay iti district athletic oval ti maysa nga aldaw a Mini-Olympics a nakipartisiparan dagiti empleado ti LGU-Cabugao ken dadduma nga ahensia ti gobierno a pakairamanan ti PNP, BFP, NTA, ken dagiti lokal nga opisial.

Napagsasalipan iti Mini-Olympics ti basketball, volleyball ken badminton.

Proyekto ti gobierno probinsial iti panangidaulo da Gov. Ryan Singson ken Vice Gov. Deogracias Victor Savellano ken ti lokal a gobierno ditoy nga idadauluan da Mayor Edgar S. Cobangbang, Jr. ken Vice Mayor Deogracias Jose Savellano ti pannakaipasdek ti kabarbaro nga athletic oval para iti pannakaidur-as ti sports iti probinsia.#