CABUGAO, Ilocos Sur – Mapasimpa ken mapalawa ti Cabugao Cultural and Sports Complex kas paset ti panagsagana ti lokal gobierno para iti maangay a global reunion ditoy nga ili inton umay a tawen.
Naammuan ti Tawid News a mailatangan iti P3 million a pondo ti nasao a pasdek tapno mapalawa ken mapasimpa agsipud ta ditoy ti plano a pakaangayan kadagiti kangrunaan nga aktibidad iti Cabugao Global Grand Reunion a maangay inton Pebrero 18-20, 2014.
Maipalawa ti akin-abagatan a paset ti pasdek kas paset ti Phase II idinto nga iti Phase III, karaman a mapalawa ti sanguanan ti nasao a pasdek, mapasayaat ti dressing room, stage ken comfort rooms.
Iti pannakiuman kenkuana ti media itay nabiit, inwaragawag ni Mayor Edgardo S. Cobangbang, Jr. a batang ti Cabugao nga agsangaili iti global reunion a maangay ditoy inton Pebrero inton umay a tawen a manamnama a dar-ayan dagiti taga-Cabugao nangruna dagiti agnaeden ken agtrabtrabaho iti nadumaduma a pagilian iti lubong.
Karaman kadagiti naisagana nga aktibidad ti pannakasarabo dagiti maki-reunion sadiay Cabugao Central Park inton Pebrero 18, ti Coronation Night a pakakoronaan ti Miss Cabugao International 2014 a maangay met laeng iti Cabugao Central Park inton Pebrero 19 ken ti Mass and Picnic a maangay iti Monte Costa Resort, Barangay Salomague inton Pebrero 20.
Addaan iti tema a “One Cabugao”, kinuna ni Cobangbang a nairanta daytoy espesial a pagteng nga awisen dagiti Cabugaoenians iti amin a paset ti lubong a mangbisita manen iti nakayanakanda nga ili ken makipagselebrar kadakuada.
Maikadua a panggep ti selebrasion ti pannakapataud iti pondo para iti pannakaipasdek ti maysa nga electronic library nga aramaten dagiti estudiante iti Cabugao, iti man elementaria, high school ken kolehio.#