Cabugao ecozone, saan a makikumpitensia iti Cagayan: Cong. Ronald

VIGAN CITY – Kas ekspektaren ni Cong. Ronald Singson, adda senador  a saan a pabor iti gakat a mamagbalin iti Cabugao nga economic and free port zone agsipud iti amak a makikumpitensia daytoy iti ecozone a naipasdek iti probinsiana.

Ngem kinuna ni Singson a nakapatpatangnan dagiti dadduma a senador ket awan ti isusupiatda iti nasao a gakat.

Kinuna ni Singson a mangnamnama a kalpasan a maipalawagna a nalaing ti pagsayaatan ti nasao nga Cabugao economic and free port zone, kas  dagiti maparnuay a panggedan, ken maibaut a negosio, malawlawagan met la dagiti mangkonkontra iti gakat.

Maysa ni Sen. Juan Ponce Enrile a mangkonkontra iti panagbalin ti Cabugao nga economic and freeport zone agsipud iti posible a panagbalin daytoy a kakumpitensia ti economic zone a naipasdek iti Cagayan.

Segun ken ni Singson, duadua laeng ken ni Dip. Garcia iti Bataan a dimmatag iti public hearing iti Senado, nupay adda dagiti padada nga agilinlinteg a nangipila iti umasping a gakat para iti lugarda.

Kinuna ni Singson a “binanatan” ida ni Sen. Enrile ket saan a nakasungbat ni Garcia kadagiti sinaludsod ti senador.

“Medio nakasungbattayo met,” kinuna ni Singson sana innayon a “hopefully, malawlawagantayo met laeng ni Sen. Enrile a no kabaelanda nga ag-succeed ti economic and freeport zone iti Cagayan, kabaelantayo met ditoy Ilocos Sur.”

Impalgak ni Singson a nailatangen ti P5 milion para iti consultancy a mangaramid iti feasibility study ti Cabugao economic and free port zone, manipud iti inception, legislation, agingga iti implementasion, infrastructure, port operations ken dadduma pay.

“Masapul ti detalyado a feasibility study tapno isunto met la ti pangdepensatayo iti Senado tapno maipakitatayo no feasible wenno saan,” kinuna ni Singson.

Kinuna ni Singson a no maipasdeken ti economic and freeport zone, adunton ti establisamiento a maipatakder kas dagiti paktoria, hotel, gaming, entertainment ken dadduma pay ket saanton a mapan iti Manila wenno ballasiw-taaw nga agsapul iti trabaho dagiti agindeg agsipud ta adunto dagiti maparnuay a panggedan.

Kinuna ni Singson a saan a maikkatan ti pamastrekan ti Cagayan, ta “sabali ti investorda, sabali met ti investorstayo.”

“Ti justificationtayo, no matuladtayo ti success ti Cagayan economic and freeport zone authority ditoy Ilocos Sur, nasayaat unay, pagsayaatan ti gobiernotayo a nasional,” kinuna ti diputado.#