Cabugao police station, nainaguraran

CABUGAO, Ilocos Sur – Nainaguraran ti kabarbaro a police station ditoy nga ili idi Agosto 5.

Mismo a da Ilocos Sur Provincial Police Office Director Senior Supt. Nestor E. Felix, Police Chief Inspector George R. Marca a nangibagi iti PNP Region 1, Governor Ryan Singson, ken Vice Governor Deogracias Victor Savellano dagiti nanggetteng iti laso kas pannakalukat ti baro a pasdek a naipatakder iti amianan ti public market ditoy nga ili.

Malaksid dagiti opisial ken kamkameng ti PNP-Cabugao nga indauluan ni COP Senior Inspector Ramil Llarenas, dimmar-ay pay iti nasao a pasken dagiti kameng ti sangguniang bayan nga indauluan ni Vice Mayor Deogracias Jose Savellano, dagiti 33 a barangay captains, pangulo dagiti nadumaduma a departamento ken dagiti empleado ti munisipio.

Nabendisionan pay iti daytoy met la nga aldaw ti baro a patrol car ken motorsiklo ti PNP police station babaen ken ni Fr. Felix Costales, kura paroko daytoy nga ili.

Maysa a plake ti naited ken ni Marca kas pammadayaw iti naitulongna iti pannakapaadda ti nasao a pasdek ken iti pannakikammayet ti gobierno probinsial.#