Footer

CAFGU member, ginudas armado a lalaki riding in tandem

MAGSINGAL, Ilocos Sur – Maysa a CAFGU member ti pinapatay dagiti armado a lalaki a nagkalubbon iti motorsiklo iti mismo nga uneg ti tiendaan publiko ditoy idi agsapa ti Mayo 4.

Immuna a naitaray iti Magsingal District Hospital ni Wilvie Arconado y Uroloza, 30, baro, ken residente iti Barangay Maratudo ditoy nga ili, sa naiyalis iti Metro Vigan Cooperative Hospital ngem pimmusay iti nasao nga ospital bayat ti pannakataming dagiti sugatna.

Iti inisial nga inbestigasion dagiti polis, iti agarup alas 8:00 ti bigat iti nadakamat nga aldaw, magmagna ni Arconado iti pasilio iti uneg ti tiendaan publiko idi kellaat a pinaltogan ti dua a suspek iti sumagmamano a daras a nagsagrapanna kadagiti sugat iti nadumaduma a paset ti bagina.

Mapapati a naglibas dagiti di nabigbig a suspek a naglugan iti asul a Honda XRM iti daya a direksion.

Intaray ti maysa met laeng a CAFGU member ni Arconado iti ospital.

Nakasarak ti SOCO team manipud iti Ilocos Sur Provincial Police Office iti 13 a kapsula a mapapati a naggapu iti cal. 45 iti nakapasamakan iti krimen, malaksid laeng ti dua a naiputok a bala, 2 a metallic fragments ken maysa a deformed slug.

Di pay ammo no adda pakainaigan ti trabaho ti biktima iti pammapatay.

Kabayatanna, aksidente a napaltogan ti maysa a mannalon bayat ti panaggiinomda idi rabii ti Mayo 2 iti Ssitio Baybayabas, Barangay Maas-asin, ditoy met laeng nga ili.

Naitaray iti ospital ni Carmelo Ullero y Asuncion, 30, baro, mannalon, ken residente iti nadakamat a barangay gapu iti sugatna iti tian maigapu iti aksidente a pannakapaltog kenkuana ni Alfredo Ullero, kalugaranna met laeng.

Segun iti report, madama nga agiinom ti biktima, ti suspek, ken dadduma pay a di nainaganan a kakaduada iti balay ni Marcelino Ullero idi mapasamak ti insidente.

Saan a nailanad iti report no kasano nga aksidente a napaltogan ti suspek ti biktima.#