CAFGU member, nabtakan iti granada

SAN EMILIO, Ilocos Sur – Nadunor ti maysa a CAFGU member idi mapapati a bimtak ti granada nga iggemna bayat ti panangprobokarna ti pamiliana idi rabii ti Abril 28.

Naitaray iti Candon City Hospital ni Dominador P. Gabor, 51, naasawaan, kameng iti 17th IB CAFGU ken residente iti Barangay Paltoc, ditoy nga ili gapu iti dunorna iti makannawan a pungupunguan ken luppona gapuanan ti panagbettak ti iggemna a granada.

Sakbayna, mapapati a nabartek ni Gabor ket parparuarenna ti pamiliana iti balayda iti awan a rason idinto nga iggemna ti maysa a MK11 hand grenade.

Nakarekobre dagiti nagresponde a polis iti shrapnel manipud iti nasao a granada iti nakapasamakan ti panagbettak.#