Candon City bypass road, pormal nga inanugararan ni PRRD

CANDON CITY — Pormalen nga inanugaran ni Presidente Rodrigo Roa Duterte ti pito a kilometro a bypass road iti Candon City idi malem ti Hulio 25, 2019.

Iti sango ti nainget a seguridad nga impaay ti Philippine National Police, Philippine Army ken Presidential Security Group, kadua ni Presidente Duterte iti pick-up truck a nangdungpar iti laso ti bypass road da Department of Public Works and Highways Secretary Mark Villar, Senator Bong Go ken dadduma pay nga opisial iti pormal nga inagurasion ti pito a kilometro ti kalsada.

Iti naangay a programa nga inatenderan da Gov. Ryan Singson, Cogresswoman Kristine Singson Meehan, Congressman Deogracias Victor Savellano, Candon City Mayor Ericson Singson ken dadduma pay nga opisial iti DPWH ken iti Ilocos Sur, pinadayawan ni Presidente Duterte dagiti agpapaay iti DPWH ken lokal a gobierno iti nadaras a pannakaileppas ti bypass road.  

“May the successful completion of this project motivate the men and women of DPWH and all other government agencies to ensure the timely implementation and completion of all on-going government infrastructure projects,” kinuna ni Presidente Duterte iti paset ti panagsaritana.

“With the help of our dedicated local government officials and with the hardworking people of Ilocos region, I believe that we can maximize the opportunities presented with this recent development,” kinuna pay ti Presidente.

Impalgak ni Presidente Duterte a ti pannakaileppas ti by-pass road iti Candon City ket padur-asenna ti ekonomia iti dayta a lugar ken kabangibangna nga ili. Indariragna pay iti pribado a sektor ti aktibo a pannakikaysada iti pannakaisayangkat dagiti proyekto a mangpadur-as iti biag dagiti umili.

Ti bypass road iti Candon City manipud Brgy. Tablac, labes ti beddeng ti ili Santiago, agingga iti Brgy. Ayudante, sakbay ti beddeng iti ili a Santa Lucia, ket padarasenna iti 20 a minuto iti kadawyan a 40 a minuto a panagdaliasat iti Manila North Road a lumasat iti sentro ti siudad.

Iti agdama, narugian metten ti construction ti Bantay – San Ildefonso bypass road, ken Bantay – Caoayan road a proyekto ti DPWH babaen ti panangilungalong ni Cong. Savellano. No maileppasto dagitoy dua a bypass road ket padarasenna ti taray ti trapiko iti uneg ti Metro Vigan.