Footer

Candon City Council, nagtignay tapno marisut problema illegal wet vendors

CANDON CITY – Adda latta dagiti sulpeng nga aglaklako iti  aglikmot ti public market idinto nga adda naisangrat a disso a paglakuanda.

Iti privilege speech ni Sangguniang Bayan Member Julio Acance, chairman iti committee on public market ken slaughterhouse, kinunana nga adda pay laeng dagiti aglaklako iti aglikmot ti Candon Public Market kas iti Gaerlan ken Madarang street a pakaapektaran dagiti legal nga aglaklako iti wet market.  

Iti privilege speech ni Acance, nadakamatna pay dagiti report a kaadda dagiti depektibo a pagkiluan dagiti suitik nga aglaklako.

Kanaig daytoy, nagtignay ti konseho ditoy ket nangangay ti maysa a public hearing tapno mataming ti nasao a problema a pakaigapuan ti bumasbassit a mapastrek ti siudad.

Kinuna ni Albert Abaya, market administrator, a nupay adda panagtiliw nga isaysayangkatda kadagiti illegal wet market vendors, sumagmamano kadagitoy ti nasulpeng latta gapu ta mapapati nga adda mangproprotektar kadakuada.

Linagidawna pay ti panaggatang dagiti empleado ti siudad kadagitoy illegal nga aglaklako.

Kabayatanna, iti interbio ken ni SPM Aristeo Valdez, nakunana  nga imbes a maisina, maisubli laengen ti wet market iti tiendaan publiko agsipud ta bimmassiten ti aggatgatang iti wet market ken maparparti iti slaughterhouse gapu ta saan a naurnos ti tiendaan, narugit, ken suitik dagiti sumagmamano a wet market vendors.

Ngem kinuna da SPM Frankie Bona ken SPM George Valdez a napimpintas  a masimpa ti naisina a wet market ti Candon tapno ditoy ti paglakuan dagiti vendor ti karne, ikan ken natnateng.

Kinuna da Bona ken Valdez nga amkenda a saan nga agkanay ti wet section no maisubli iti public market ket problema met laeng agsipud ta iti kalsada ti paglakuanda a mangpakaro iti problema ti trapiko.

Kitkitaenda pay ti anggulo a no saan a maaramat ti nabangon a wet market, posible a maisubli iti akinkukua a nangidonar iti daga.

Karaman iti kondision a no saanen a maaramat ti wet market, maisubli iti akinkukua ti daga.

Kinunada pay a no masimpa ti public market, agsubli a makitienda ditoy ti ag-40% a taga-Candon a  makitientienda iti Santa Lucia ken Santa Cruz..#