Footer

Candon City, nairaman iti simultaneous flag raising iti Aldaw ti Wayawaya

CANDON CITY – Nairaman daytoy a siudad iti simultaneous flag raising a naangay iti lugar a nangusat  iti pannakawayawaya ti pagilian kadagiti nangsakup kenkuana itay Hunio 12, Aldaw ti Wayawaya.

Kinuna ni sekretario ti Department of Public Works and Highways Hermogenes Ebdane Jr, a nairaman  daytoy a siudad a makigiddan kadagiti sumagmamano a lugar iti pagilian a maisa ti banderana kas pammigbig ti gobierno iti  “Ikkis Ti Candon” babaen ti panangidaulo ni Heneral Isabelo Abaya.

Iti panagbitlana iti programa a naisayangkat iti Candon Plaza Wayawaya ken Candon City Plaza, impalagip ni Mayor Allen Singson ti kinapateg ti “Ikkis ti Candon” iti panagwaywayas ti pagilian gapu iti panangideklara ni Heneral Isabelo Abaya ti panagwayawaya ti Candon manipud kadagiti Kastila idi Marso 25, 1898.

Inlawlawag ni Winnie Palafoks, coordinator ti programa iti Candon ken agdama a history researcher ti National Historical Institute a dagiti lugar a nangideklara iti wayawaya manipud idi 1892 agingga iti 1898 ti kangrunaan a nagibasaranda a pakaisayangkatan iti aggigiddan a  flag raising ken programa iti Aldaw ti Wayawaya iti pagilian.

Karaman ti simultaneous flag raising ti Bacolod City kas panangpadayaw iti isusuko dagiti Kastila ken ni Heneral Aniceto Lacson ken Juan Araneta; iti Cebu City kas pananglagip iti Tres de Abril, Tarlac nga isusuko dagiti Kastila ken ni Heneral Francisco Mabulos; ken ti Nueva Ecija kas pananglagip iti Cry of Nueva Ecija nga indauluan ni General Mariano Llanera.

“Ti inaramid ni Don Isabelo Abaya ket maysa nga addang tapno mawayawayaan ti pagilian manipud iti ima dagiti nangsakup kadatayo a Kastila iti uneg ti nasurok tallo gasut a tawen,”  kinunana ni Palafox iti Tagalog bayat ti interbio kenkuana ti DZTP Radio Tirad Pass.

Malaksid ken ni Sec. Ebdane, karaman dagiti timmabuno iti flag raising da Deputy Speaker Eric Singson, Gobernador Deogracias Victor Savellano, Vice Governor Jeremiah Singson, dagiti regional directors ti nadumaduma nga ahensia ken departamento iti rehion uno, provincial directors, mamayor, city ken barangay officials ken residente ditoy umili ken dadduma pay.

Kalpasan ti flag raising ceremony iti Plaza Wayawaya, naisaruno ti pannakaidaton dagiti sabong iti sakaanan ti monumento ni Don Isabelo Abaya. 

Naiwaras pay kalpasanna dagiti cash gifts ken food Items kadagiti benepisario ti Oyster program, dagiti agas para iti Botika sa Barangay ken ti ken Philhealth cards. (Danny Antalan)