Footer

Candon City, nakasagana iti didigra

CANDON CITY – Kas panagsagana daytoy a siudad iti sumangbay a kalamidad, gimmatang ti gobierno ditoy kadagiti ramit ken kasapulan a pang-emerhensia.

Karaman kadagiti ginatang ti gobierno ti siudad dagiti floating vests, flashlight, botas, chainsaw, first aid kits, stretcher, hand held radios, rubberized banca ken dadduma pay a ramramit.

Babaen dagitoy a ramramit, nakasaganan ti Candon City no adda man dumteng a layus, bagyo ken uray aksidente,” kinuna ni Engr. Steve Martinez, coordinator ti Candon City Risk Reduction Management Council.

Kinuna ni Martinez nga adda pay dagiti maisayangkat a training  tapno ammo dagiti umili ti rumbeng nga aramidenda no adda dumteng a kalamidad wenno emerhensia.

Impatalged ni Martinez a 24 oras a nakalukat  ken adda agbantay ti CCRRMCO. (Danny Antalan)