Candon City police station, napalawa

CANDON CITY – Nawaywaya itan ti aangsan dagiti polis iti napalawa nga estasionda a nabendisionan ken pormal a naluktan idi Hulio 6.

Iti interbio ti DZTP Tirad Pass ken ni Candon City Chief of Police Marlo Castillo, kinunana a napalawa ti police station babaen ti panangigannuat ni Mayor Allen Singson ken dagiti city officials ket dakkel ti yamanna ta nasaysayaat met laeng ti panagserbida kadagiti umili.

Inukopar itan ti police station ti Candon Health Center a naiyalis iti sigud a Holy Family Hospital iti Barangay Calaoaan.

Iti dati a PNP station ti pakasarakan itan iti tactical departments ken motor pool kabayatanna a ti baro ken nainayon nga opisina ti yan ti opisina ti COP, Deputy COP for Admin, Women’s and Children’s Section, Public Safety Office, media center ken information desk.

Kinuna ni Castillo a malaksid iti selda para kadagiti babbai ken agtutubo, adda pay barracks para kadagiti babbai a polis.

Kabayatanna, kagiddan ti pannakalukat ti napalawa a PNP Station ti panakaited ti dua a kabarbaro a jumper a motorsiklo nga aramaten dagiti polis.

Kinuna ni Engineer Steve Martinez, city engineer ti siudad, kalpasan ti expansion ken renovation ti Candon PNP Station, ken pannakaiyalis ti health center iti nalawlawa a paggiananna, manamnama a umalisto metten iti nalawa nga opisina ken pagbaludan ti BJMP ti Candon City. (Danny Antalan)