Candon City, San Vicente, manipud mayor agingga iti konsehal, awan kinasangoda

CANDON CITY –  Nagbalin a “nakamagmaga” ti kalkalpas nga eleksion iti maysa a siudad iti maikadua a distrito ken maysa nga ili iti umuna a distrito ti Ilocos Sur gapu ta kadagitoy a lugar, awan a pulos ti timmakder a kasango ti pabutosan a mayor, bise mayor ken dagiti katiketda a konsehal.

Unopposed amin dagiti kandidato manipud iti mayor, bise mayor agingga iti konsehal iti Candon City ken San Vicente iti umuna a distrito ti Ilocos Sur.

Iti Candon City, malaksid nga awan ti simmango iti anak ni dati a House Deputy Speaker Eric Singson para kinamayor ken ti katiketna nga incumbent a  vice mayor a sabali pay a Singson, awan a pulos uray maysa a timmakder a nagkandidato para konsehal iti sabali a partido malaksid dagiti sangapulo a katiket dagiti Singson iti babaen ti Liberal Party.

Nupay neophyte ni Dr. Ericson Singson iti politika, ikutda ken ni incumbent Vice Mayor Alfonso Singson ti apeliedo ti political kingpin iti maikadua a distrito ti Ilocos Sur ket umdas daytan tapno nagaripapa dagiti sabsabali pay a politiko a sumango kadakuada.

Di met nagling-et dagiti kandidato a nairaman iti tiket da Dr. Singson a nagkampania agsipud ta awan met ti kasangoda. Ketdi, iti daytoy a panagbubutos, ti laengen nagsasalipanda no asino ti kaadduan ti butos ket daytoy ti nagun-od ti sabali pay a Singson iti kinatao ni Kristelle a nakagun-od iti 20,310 a butos a sinaruno ni George Valdez (18,256), Johnny Nestor R. Itchon (17,703), Aristeo Valdez (16,893), Rhodana Abrero (16,814), Florendo Mangasar, Jr. (14,728), Fredelito Balagot (14,446), Ma. Charina Bona (14,362), Aileen Rhoda Acal (14,101) ken David Wagayen (13,195).

Kabayatanna, unopposed manen dagiti agassawa a Jose Tabanda III ken Nancy iti kalkalpas a panagbubutos. Uray idi 2010, awan ti kinasango dagiti agassawa.

Ita a panagpipili, uray dagiti katiket da Tabanda para konsehal ket awanen ti kasangoda ket kas iti Candon City, no asino ti kaaduan ti butos ti namaggagar kadagiti umili ditoy a napan nagbutos.

Dagiti sumaganad dagiti unopposed a counsilor-elect iti San Vicente: Melecioi Daquep, Romel Reyes, Reynaldo Riberal, Eddie Ridulfa, Warlito Ridulme, Brett Rojas, Jun Rola, ken Cynthia Valencia.

Iti met Vigan City, nupay unopposed da incumbent Mayor Eva Marie S. Medina ken Vice Mayor Lourdes Baquiran iti babaen ti Nacionalista Party, agdagup iti sangapulo ket tallo dagiti nagkandidato para konsehal.

Kas ninamnama, imbayog ni Medina kadagiti kapartiduanna ket kangatuan iti butos ni Juan Carlo Medina nga anakna.

Karaman kadagiti nangabak da Kisses Marquisse Agdamag, John Patrick Singson, Joy Benette Orio, Francisco , Constante Benzon, Kristen Figuerres, Benedicto Jose Verzosa, Ramil Arce ken George Villanueva.

Limsot a number 5 ni Francisco Arturo Ranches III a nagkandidato iti babaen ti Liberal Party.

Ni laeng dati a konsehal Andres Adriatico ti natnag iti tiket da Medina.#