CANDON CITY – Nagmula iti bakawan ken nipa dagiti city scholars ditoy siudad iti igid ti karayan ti Barangay Darapidap idi Nobiembre 4 kas panangsuportada iti programa ti city government a mangbiag iti karayan iti nadakamat a barangay.
Naimula dagiti bakawan ken nipa a kanayonan dagiti immun-unan a naimula iti Barangay Darapidap.
Kinuna ni Barangay Captain Eddie Villanueva a napintas nga imula ti bakawan ken nipa ta pagaayat a pagindegan ken pagitlogan dagiti ikan.
Timmulong iti nasao a gannuat dagiti barangay officials ti Darapidap, Candon City, City Environment and Natural Resources Office, City Agriculture Office ken Mayor’s Office.
Kinuna met ti presidente ti gunglo dagiti sumurok-kumurang dua gasut a city scholars nga isaysayangkatda dagiti kastoy nga aktibidad kas panangsuportada iti programa ti city government a mangbiag kadagiti karayan ken kas panagyamanda iti pannakapagtuloyda nga agbasa babaen ti scholarshop program daytoy.#