Candon Health Office, nagipakat iti Ovi-trap

CANDON CITY – Sakbay nga agraira ti dengue iti isasangbay ti tudtudo, nangiwayat ti Candon Health Office  kadagiti addang a mangpaksiat iti lamok.

Kinuna ni Angie Rubang, sanitary inspector, a napandan nagipakat iti Ovi-trap kadagiti amin a pagadalan ditoy siudad.

“Nasurok 500 a kuarto iti pagadalan ti naikkanmi ti ovi-trap,” kinunana ni Rubang iti interbio kenkuana ti DZTP itay nabiit.

Kinuna ti sanitary inspector a nangisayangkatda payen iti search and destroy ken clean-up drive kadagiti barbarangay tapno mapaksiat dagiti kitikiti.

Addan nairekord nga uppat a kaso ti dengue iti Candon a naggapu amin iti Barangay Bugnay, Candon City.

Maipalagip nga iti napalabas a tawen, ti Candon City ti maysa kadagiti kaaduan ti kaso ti dengue.#