Caoayan, nakasaganan mangrambak panagpiestana

CAOAYAN, Ilocos Sur – Nakasaganan dagiti agtuturay ditoy a mangselebrar iti panagpiesta ti ilida, daytoy ti kinuna ni Mayor Germie Singson-Goulart.

Mangrugi inton Nobiembre 10, luktan ti DepEd ti selebrasion ti piesta babaen ti parada, marching band competition ken panagpabuya dagiti nadumaduma a pagadalan iti folkdances.

Kadagiti sumarsaruno nga aldaw, maipabuya ti maysa a Zarzuela Ilocana, social bingo, lumba iti rakit, pageant para iti pannakapili ti Saniata ti Caoayan, Rambak Baybay concert a panagtokar dagiti banda manipud Baguio ken Vigan.

iti fluvial parade iti Mestizo river, adda pay maangay a pangrabii a maisagut iti pamilia Quirino iti rangtay a sumrek iti ili.

Iti kaaldawan ti piesta, Nobiembre 16, Quirino Day, maangay ti maysa a misa ken pannakaidaton dagiti sabong kas panglagip ken ni Apo Pidiong iti sanguanan ti munisipio.

Mabendisionanto pay iti daytoy nga aldaw ti Quirino Children’s Park ken Evaristo Titong Singson plaza sadiay Barangay Pandan.#