Capitol Outreach Program, naisayangkat 3 upland towns

LIDLIDDA, Ilocos Sur – Saan a nagbalin a lapped ti napigsa a tudo ti panangidanon ti grupo ti Capitol Outreach Program ti serbisiona kadagiti barbarangay ti tallo nga upland municipality a pakairamanan daytoy nga ili itay nabiit.

Nagiwaras ti grupo kadagiti nadumaduma a groseria ken wall clock kadagiti residente ti Quirino, Banayoyo ken daytoy nga ili, kasta met a naikkan tunggal estudiante kadagiti bag a naglaon kadagiti school supplies.

Segun ken ni Gov. Luis “Chavit” Singson, maysa daytoy a wagas ti gobierno probinsial tapno maiyasideg kadagiti tattao dagiti kasapulanda a mangitunda iti pannakakissay ti panagbisin, malnutrision, ken panangipaay iti kangrunaan a kasapulan ken masapsapul iti pagadalan ken libre a serbisio salun-at.

Immuna a tinurong ti grupo ti ili a Quirino idi Hunio 23 tapno iyawatda dagiti regalo kadagiti siam a barangay iti nadakamat nga ili. Kagiddan daytoy ti panangiyawat ni Provincial Social Welfare and Development Officer Ferdinand Concepcion ti 482 a PhilHealth cards kas paset ti programa ti gobierno national a mangipaay iti PhilHealth cards iti amin a pagtaengan.

Ti met ili a Banayoyo ti nagrekuridaan ti grupo idi Hunio 24 ket sangapulo ket uppat a barangay ti nakaidanonan dagiti sagut ti gobierno probinsial para kadagiti pamilia ken estudiante idinto nga idi met Hunio 27 ti panagiwaras ti grupo ditoy nga ili.

Kabayatanna, agliklikmot metten ti mobile water purifier iti nadumaduma a barbarangay iti umuna ken maikadua a distrito tapno maipaayan dagiti agindeg iti probinsia iti libre a nadalus a danum a mainum idinto a sabali pay a grupo ti dumandanon tapno mangipaay iti libre a medical/dental mission ken supplemental feeding.

Kinuna ti gobernador nga agtultuloy ti programa agingga a maserbianda ti 768 a barangay iti Ilocos Sur.#