Footer

Caretaker, mannalon, nagtinnagbat

NAGBUKEL, Ilocos Sur – Nagtinnagbat ti maysa a caretaker ken maysa a mannalon gapu iti panagsinnungbatda bayat ti panaginomda iti maysa a bodega sadiay Sitio Calampaan, Barangay Casilagan, ditoy nga ili idi rabii ti Disiembre 10.

Agpada a naitaray iti Central Ilocos Sur District Hospital, Narvacan da Rudy Gaspar y Martin, 49, baro, caretaker/helper, ken ni Jose Lao-is y Mendoza, 54, baro, mannalon, agpadada a residente iti Barangay Sarmingan, Nagbukel gapu iti sugatda gapuanan ti panagtinnagbatda.

Segun ti report, kalpasan ti panagapas dagiti dua iti talon a kukua ti suspek, nagginomda iti bodega ngem naparnuay ti nabara nga argumentoda ket tinagbat ni Gaspar ni Lao-is a nagsagrapan daytoy iti sugat iti makannigid nga imana.

Tinagbat met ni Lao-is ni Gaspar iti sumagmamano a daras iti ulo, rupa, likud ken ima ti naud-udi.

Narekobre dagiti nagresponde a polis ti dua a daradara a bolo iti naginoman dagiti dua.#