Cash assistance, maited napintas ti rekordda a tobacco farmers

SAN JUAN, Ilocos Sur – Impakaammo ni National Tobacco Administration Supervisor Jose Taclas a madaman ti re-assessment iti rekord dagiti tobacco farmers nga inikkan ti opisinada iti cash assistance iti napalabas a tobacco season.

Kinunana a maikkan manen dagiti mannalon iti cash assistance iti sidong ti rice production loan no napintas ti rekordda.

Iti naglabas a tobacco season, nakaipautang ti NTA iti P30 million kadagiti tobacco farmers iti intero a probinsia.

Kabayatanna, nagsardengen dagiti trading centers ditoy San Juan ken Cabugao nga aggatang iti tabako, segun ken ni Taclas.

Nupay kasta, adda pay dagiti cowboys nga aggatgatang iti reject ken sundry ket mapapati nga ilaklakoda kadagiti dadduma a trading centers iti maikadua a distrito ti probinsia.

Naammuan ken ni Taclas nga iti naglabas a tobacco season, immabut iti P40 ti presio iti reject idinto a P79 ti presio ti quality tobacco.#