Footer

Cash cards, naiwaras kadagiti 4Ps beneficiaries

CABUGAO, Ilocos Sur – Agdagup iti 501 a benepisario ti 4Ps manipud iti 33 a barangay ditoy nga ili ti immawat iti cash cards iti simple a programa a naangay idi Marso 21 iti opisina ti DSWD-4Ps ken sinaksian dagiti pannakabagi ti DSWD Regional Office 1.

Iti ababa a mensahena, pinalagipan ni Mayor Edgardo S. Cobangbang, Jr. dagiti immawat iti cash card nga itultuloyda nga aramiden dagiti pagrebbenganda tapno matungpalda dagiti kasapulan kadakuada kas benepisario iti nasao a programa para iti edukasion ken salun-at dagiti agbasbasa nga annakda.

Timmabuno iti cash card distribution dagiti pannakabagi ti DSWD Region 1 a pakaibilangan da DSWD Municipal Roving Bookkeeper Maria Theresa N. Calvo ken Noel Baguitan; Cash Card Focal Teresita Pamintuan idinto a timmulong da Aid S. Cueto ken dagiti Municipal Link Staff iti pannakaibunong dagiti cash cards.

Kinuna ni DSWD Municipal Link Jessie Ann O. Tabut a kaadduan kadagiti immawat iti cash cards ti nangrugi idi Hulio agingga iti Disiembre idi napan a tawen.

Adda met dagiti immawat iti cash cards a late registrants a nangrugi laeng idi Setiembre ken Oktubre 2013, segun ken ni Tabut.#