Footer

Cataract mission, naisayangkat

VIGAN CITY– Dua nga aldaw a naisayangkat ti maysa a cataract mission para kadagiti agsagsagaba iti sakit ti mata iti Gabriela Silang General Hospital idi Agosto 27 ken 28, 2013.

Kinuna ni Bokal Jerry Singson a libre ti naited a cataract mission  kas paset ti tinawen a programa ti gobierno probinsial a panangselebrarna iti  Bulan ti Mata tunggal Agosto.

Segun ken ni Singson, libre ti konsultasion, eksamen, agas ken uray pannakaopera ti katarata dagiti adda sakit ti matana.

Impalgak ni Singson a posible a daytoyton ti maudi a cataract mission agsipud ta addan programa ti provincial government nga addanton aginaldaw a check-up ken  operasion iti katarata iti GSGH kalpasan a napagnunummuanan dagiti opthalmologists a maki-tie-upda iti gobierno probinsial  para iti aginaldaw a pannakataming dagiti adda problemada iti mata.

Innayon ti bokal a libre daytoy a serbisio no adda PhilHealth ti pasiente.

No awan ti PhilHealth ti pasiente, masapul nga agaplikar, kinuna ti bokal sana innayon nga agepektibo daytoy kalpasan ti tallo a bulan.#