CBCP: Revamp iti Comelec

TIMMIPON ti Catholic Bishops’ Conference of the Philippines (CBCP) a nangidagadag iti pannaka-revamp ti Commission on Elections kalpasan ti napaliiw a kinarugit ti naisayangkat nga eleksion itay Mayo 14.

No dagiti bishops ti mapatuloy, kasapulanen a mabalbaliwan dagiti agtakem iti Comelec ket madutokan a kasukatda dagiti tattao nga awan ti pagduaduaan iti integridadda ken kabaelan agsipud iti napukawen a panagtalek ti publiko kadagiti komisioner ti poll body nga idauluan ni Chairman Benjamin Abalos, Sr.

Saan a mapabasol dagiti kritiko ti Comelec no saanda a kapkapnekan ti naisayangkat nga eleksion.

Pagarigan laengen ti kinasenador, agingga ita, di pay naiproklamar ti nangabak iti maudi a puesto a pagbalbalubalan da dati a diputado Juan Miguel Zubiri ken ni Aquilino Pimentel III gapu iti alegasion iti naipanurok a panagsuitik iti eleksion.

Dinawat ni Pimentel iti Comelec a saanna nga iraman nga ibilang dagiti butos iti Maguindanao ken sangapulo pay a munisipalidad iti Mindanao gapu ta “statistically improbable” dagiti resulta ti panagbubutos kadagitoy a lugar.

Iti Maguindanao laengen, 12-0 ti resulta ti panagbubutos a nagpayagpagan dagiti kandidato ti Team Unity ti administrasion.

Ditoy ti nangilugesan ni Zubiri kadagiti amin a kandidato gapu ta isu ti kadakkelan ti butos ket iti apagdarikmat, napunas ti nasurok a 110,000 a nangitarayan ni Pimentel kenkuana.

Ditoy met ti nakaibbongan dagiti sangapulo ket siam a kandidato para senador a kuna pay ni Abalos nga “statistically improbable.”

Sumagmamano a mangisursuro ti nangibulgar nga inukkon ida dagiti armado a lallaki ket impakni dagitoy sada pinagsurat iti balota a pabor amin kadagiti kandidato ti Team Unity.

Iti pannakaisurat daytoy, madama ti oral argument da Pimentel ken dagiti Comelec officials ken Zubiri iti Korte Suprema mainaig iti petision ni Pimentel a mangpasardeng ti proklamasion ni Zubiri agingga iti saan a mapudasdasan ti kinaotentiko dagiti municipal certificates of canvass a nangibasaran ti Comelec nga agtugtugaw kas National Board of Canvassers iti panagbilangna iti butos iti Maguindanao.

Ngem yan ti problema, sagudayen ti linteg a mabalin a maikkat laeng dagiti commissioners babaen ti impeachment.

No patien dagiti agtuturay iti Comelec, ar-aramatenda ti annongenda a sipupudno ken iti amin a kabaelanda ngem isuna laeng ta dida maited a nasayaat ti serbisioda gapu iti sistema ti elektoral.

Ngem ti saludsod: Kasano a mapasubli ti panagtalek dagiti umili iti Comelec no dagitoy latta agdama nga opisial ti pakaikumitan  ti nadalus, naurnos ken natalna nga eleksion?