CCTV, maipasdek iti Tagudin quarantine checkpoint

VIGAN CITY – Maipasdek ti maysa a closed circuit television camera iti quarantine checkpoint sadiay Bio, Tagudin tapno mamonitor dagiti sumrek a baboy iti probinsia.

Impanamnama pay ni Gov. Ryan Singson ti panangipakatna iti reward system kas maysa a solusion iti reklamo dagiti hog raisers iti Tagudin nga adu latta dagiti baboy a maipuslit iti probinsia iti baet nga adda quarantine checkpoint iti Barangay Bio ditoy nga ili.

Segun iti maysa nga opisial ti gunglo dagiti agtartaraken iti baboy iti nadakamat nga ili a nalukay ti pannakaimaton ti quarantine checkpoint, isu nga adda latta dagiti makaskastrek a baboy iti probinsia a makaapekto iti industria ti baboy.

Kinuna pay ni Singson a masapul a mai-relocate ti quarantine checkpoint iti nawaywaya a lugar tapno makita dagiti lumasat a trak nga agkarga iti baboy a maipuslit iti probinsia.#