CCTV recorder, natakaw iti mayor’s office

NARVACAN, Ilocos Sur – Ninamnama siguro dagiti mannanakaw a dakkel ti matakawda iti opisina ti tesorero ti lokal a gobierno ditoy ngem malasda ta uray sentimo ket awan ti nakurimesda.

Segun iti report manipud iti polis ditoy, nakastrek dagiti di nabigbig a mannanakaw iti opisina ti tesorero babaen ti panangdadaelda iti padlock sada pinorsar a linuktan dagiti drawer dagiti lamisaan.

Ngem kinuna ni Zenaida Salang y Cabras, tesorero iti munisipio nga awan ti napukaw wenno natakaw iti opisinada.

Ngem iti panangiwayat dagiti polis iti ocular inspection kadagiti amin a pagopisinaan iti municipal hall, naduktalanda a napukaw ti recorder wenno main memory box ti nayinstolar a cross-circuit television iti opisina ti Mayor.

Mapattapatta nga aggatad ti napukaw a recorder iti sumurok kumurang P20,000.00.#