Footer

CDA, awan maitulongna: ISECO director

CABUGAO, Ilocos Sur – Kinuna ti maysa a board director ti kooperatiba ti elektrisidad ditoy probinsia nga ipagpagna ni COOP-NATCCO Party List Representative Jose Ping-ay a maikappeng dagiti electric cooperatives iti babaen ti Cooperative Development Authority, ngem aggudengda agsipud ta adu dagiti kooperatiba a nagmiembro iti CDA a nagpukaw.

“Dagiti dadduma a kooperatiba, nag-anderda ti CDA, ania ti nagbalinanda tatta? They are all in the red (naglugida amin)… panayda negative balance… naabusar dagiti dadduma,” kinuna ISECO Board Director Bong  Savellano iti interbiona iti maysa a lokal a radio station itay nabiit sana sinaludsod: “Kayattayo ngarud daydiay?”

Iti maysa nga interbio ken ni Ping-ay, kinunana a nupay maysa a kooperatiba ti ISECO, saan a kukua dagiti tattao ken dagiti consumers ket saanna a sagsagrapen dagiti pribiliheo dagiti kooperatiba a nakarehistro iti Cooperative Development Authority (CDA).

Indagadag ti party list representative nga agrehistro dagiti electric cooperatives iti CDA agsipud ta agsagrap dagitoy kadagiti exemption kas iti VAT on distribution, vat on systems loss ken vat on nighttime rates.

Ngem kinuna ni Savellano a sabali a kooperatiba dagiti electric cooperatives a kas iti ISECO ta utility ti ipatpatarayda, saan a kas dagiti dadduma a kooperatiba a para pautang wenno livelihood.

Dinakamat ti direktor a maysa kadagiti naballigian a programa daydi nag-Presidente Ferdinand Marcos ti elektripikasion ti pagilian.

Kinunana a babaen daytoy a programa, napasilawan ti dandani amin a paset ti pagilian, sana innayon a nagun-od daytoy babaen ti panangkita ti National Electrification Administration (NEA).

“… Ania ti maitulong ti CDA, … adda kadi inhinieroda a makatulong kadakami?” sinaludsod ni Savellano.

Kinuna pay ni Savellano a nupay awan ti buis a bayadan dagiti electric cooperatives no agpalistada iti CDA, adda bayadanda iti nasao nga ahensia a 10% manipud iti revenue ti kooperatiba a di met agsubli kadagiti consumers.

Iti sabali a bangir, nupay agbayad iti buis dagiti electric cooperatives iti gobierno, agsubli daytoy iti NEA nga adda iti babaenna para iti pannakatulong dagiti kooperatiba, segun iti board director.

Kinuna ni Savellano nga interesado ni Ping-ay nga agpalista dagiti electric cooperatives iti CDA agsipud ta natalged ti pinansial a posision dagiti dadduma ngem iti teknikal a rason, awan ti maitulong ti CDA kadagiti electric cooperatives.#

Enhanced by Zemanta