Footer

Cellphone bills dagiti konsehal ti Caoayan, umabot P1-M

CAOAYAN, Ilocos Sur – Taltalek pay dagiti konsehal ditoy nga ili ta malaksid a naikkanda iti libre a selpon, ti pay gobierno munisipal ti mangibaklay iti magastoda iti panangaramat iti daytoy a ramit komunikasion.

Ngem iti interbiona iti Bombo Radyo Vigan, kinuna ni Mayor Germie Singson-Goulart a sobra unay ti kadakkel ti baybayadan ti municipal government mainaig dagiti bills dagiti nawarasan iti selpon a konsehal ken sumagmamano nga opisial ti Finance committee.

“Excessive,” daytoy ti panangiladawan ni Goulart idinto nga innayonna nga umab-abot iti maysa a milion ti cellphone bills dagiti konsehal ken dadaulo ti Finance committee a bayadan ti municipal government.

Sakbayna, limtuad daytoy nga isyo idi kiniddaw ni Konsehal Demetrio Quiocho bayat ti sessionda a maikkanda koma met iti selpon agsipud ta naammuanda a baro a konsehal nga adda naiwaras a selpon nga aramaten dagiti SBM ken sumagmamano a dadaulo ti ahensia ti gobierno ditoy.

Limtuad pay a tallo a dati a konsehal ti saan a nangisubli iti naited kadakuada a selpon.

Segun ken ni Goulart, nakitada daytoy nga “excess” iti report ti Commission on Audit ken ti binuangayna a transition team a mangrebio kadagiti transaksion ti sinublatna a turay ket nagsurat iti maysa a communications firm para iti “madagdagus a diskoneksion” dagitoy kas rekomenda ti COA  gapu ta umabot iti maysa a milion ti bayadan ti munisipio iti bills ti selpon dagiti konsehal ken opisial ti finance committee.

Kinuna ni Goulart a no nausar dagiti selpon bayat ti “course of duty” dagiti konsehal, awan koma ti problema ngem nagdakkelan dagiti bills a bayadan ti munisipio ket adu koma a serbisio para kadagiti umili ti pakaipaayan ti nasao a gatad.

Naammuan a postpaid plan ti naited a selpon dagiti konsehal ken opisial ti finance committee a mabayadan iti P1,800 iti tunggal bulan ngem mapapati nga adda dagiti nasao nga opisial nga umabot iti nasursurok pay ti billsda iti makabulan.

Inyunay-unay ni Goulart a saan a naikkan iti selpon amin a department heads ket mairaman ditoy ni Vice Mayor Gemma Padaong.

Kinuna ni  Goulart nga iti dialogo iti nagbaetan ti gobierno munisipal ken iti Smart Communications, inggunamgunamna a maikkan iti “prueba wenno papeles no apay a bayadan ti gobierno” ti Caoayan dagitoy a bills.

Kinuna ni Goulart a “more than excess” dagita a cellphone bills agsipud ta “nagbalinda nga unlimited” gapu iti kaawan ti guidelines a manglimitar iti pagpatinggaan ti magasto iti pannakaaramat dagiti selpon.

“No kitkitaen dagitoy a gatad (bills iti selpon), nakapaenroltayo koman iti adu nga indigent iti PhilHealth,” kinuna pay ti mayora.

Maysa a 4th class municipality ti Caoayan ket umaw-awat laeng iti aganay P30 milion nga internal revenue allotment (IRA).#