Certified rice seeds maibunong kadagiti mannalon

STA. LUCIA, Ilocos Sur – Mawarasan dagiti mannalon iti certified rice seeds tapno adda pangrugianan nga ibunubonda iti masungad a panagtatalon, daytoy ti impalgak ti municipal agricultural officer ditoy nga ili.

Kinuna ni Floricadel Lopez, MA Officer a tunggal barangay ket maikkan iti pito a sako ti certified rice seeds. Adda kadagupan a 36 a barangay ditoy nga ili.

Segun ken ni Lopez, makaammonton dagiti barangay officials a mangkita a maibingayan amin a mannalon iti certified rice seeds.

Impakaammo pay ni Lopez nga uppat a barangay ditoy nga ili a pakaibilangan ti Nangalisan, Paratong, Luba ken Vical ti naikkan iti payao manipud ken ni Gov. Ryan Singson kas paset ti panangselebrarna iti kasangayna itay nabiit. (Danilo Antalan)