CERVANTES, Ilocos Sur – Kaano a malpas ti rangtay ti Aluling a mangisilpo daytoy a barangay iti sentro ti ili?

Daytoy ti agtaltalinaed a saludsod kadagiti umili itoy nga upland municipality aglalo kadagiti nataengan no makitada ti arig rurog nga Aluling Bridgea di met laengen malmapas iti baet a nabayagen a nairugi a mapa-takder.

Maipalagip a nairugi ti pannakaaramid ti nadakamat a rangtay iti 1977 ken namin-anon a nagsukat ti presidente ti pagilian ngem di pay nalpas daytoy kangrunaan a rangtay a mamagsilpo koma iti Cordillera Administrative Region ken Region Uno (Mt. Province ken Ilocos Sur).

Segun ken ni Mayor Benjamin Maggay, napateg ti pannakaileppas ti rangtay gapu ta daytoy ti mangpadaras iti panagtaray ti komersio kadagiti nadakamat a rehion idinto a pumigsa pay ti turismo ditoy gapu ta manipud iti ilina, dua laengen nga oras sa mag-teng ti Sagada a pakasarakan iti flying coffins, kasta metten a tallo nga oras laengen a daliasaten ti dalan nga agtu-rong iti Ifugao a pakasarakan ti Banaue Rice Terraces ken tallo nga oras ti panagbiahe iti Baguio City.

Ngem itay nabiit, maka-parag-o ti padamag ni Maggay. Kinunana nga idi maudi a lawas ti Hunio, addan naka-ipaimaanna a bidder nga isu ti mangleppas iti rangtay iti gatad a P63 million.

“Mangnamnamakami nga iti daytoy kaudian a pannakaiya-watna iti nangabak a bidder, matungpal met laengen ti nabayag a tagtagainepmi ditoy nga ili. Uray ti Katkateng Bridge a mamagkamang iti Cervantes ken Quirino, ma-dama metten ti pannakaaramid dagiti pundasionna,” innayon ni Maggay.

Kadagiti met agnaed iti Barangay Aluling, kasapu-landa unay ti pannakalpas ti rangtay gapu ta daytoy laeng ti mabalinda a pagnaan no matutudo a kaapres ti agus ti danum ti karayan. Iti agdama, an-anusan dagiti residente ti agkalantay a bumallasiw babaen ti daan a kayo ken nailet a hanging bridge iti tiempo ti tudtudo.

Kinuna ni Barangay Captain Fernando Lat-iw Jr., sangapulo ket tallo pay laeng ti tawenna idi rugianda ti rangtay a di pay nalpas agingga ita.

“Dakkel koma a nam-aymi no malpasen ti Aluling Bridge isu a denggendakami koma met ti gobierno yantangay national road dagiti pagkamangen daytoy a rangtay. Sapay koma ta iti kabiitan a panawen ti pannakalpasna tapno mana-nammi metten ti pagimbagan nga itdenna,” kinuna ti kapitan.#