Footer

Cha-cha consultaltive meeting: partisipante, 99% pabor a maamendaran ti konstitusion

CANDON CITY – Dandani amin kadagiti nakipartisipar iti maysa a consultative meeting mainaig iti proposed constitutional amendments babaen ken ni Deputy Speaker Eric Singson ti pabor iti pannakaamendar ti agdama a konstitusion ti pagilian.

Daytoy ti impalgak ni Singson a resulta ti pannakikonsultana kadagiti nadumaduma a sektor iti maikadua a distrito nga ibagianna iti Kamara bayat ti interbio kenkuana ti media itay nabiit.

“Agarup 99 percent ti mayat iti pannakabalbaliw ti konstitusion.  Ti laengen masapul a tamingen ket no ania kadagiti pasetna ti rumbeng a mabaliwan,” kinuna ni Singson idinto a nadakamatna a maysa kadagiti pabor a maamendaran ti konstitusion ni Atty. Eduardo Guirnalda a maysa idi kadagiti nakipagputar iti 1971 constitution.

Kinuna ni Singson a  tallo a saludsod ti sinungbatan dagiti partisipante iti consultative meeting: umuna, no kayatda a maamendaran ti konstitusion, maikadua,  no ania a method ti usaren no kas pagarigan kayatda, ken maikatlo, no ania dagiti partikular isyo a kayatda a mabaliwan iti agdama a konstitusion.

Nakipaset iti nasao a consultative meeting a naangay idi Nobiembre 6 iti Stern Mall ditoy siudad dagiti mamayor, bise mayor, sangguniang bayan members, papadi, abogado, hues, mannalon, mangngalap ken dadduma pay a mangibagi dagiti non-governmental organizations.

Kinuna ti diputado a pakairamanan kadagiti main-inaw a posible a maamendaran ti term limits dagiti agdama nga local officials iti gobierno agsipud ta awanton ti limitasion ti panagtakemda, saan a kas iti agdama a konstitusion a tallo laeng a termino ti panagtugaw dagiti mabutosan a lokal nga opisial; ti 60-40 ownership dagiti foreign investors; ti political dynasty, ken dadduma pay a benneg.

Mainaig iti wagas iti pannakabalbaliw ti konstitusion, 22 kadagiti partisipante ti umanamong iti constitutional convention idinto a 122 ti mayat iti constituent assembly iti naisayangkat a panagbubutos a kas insingasing ni Msgr. Vicente Avila.#