Chairman komite iti Vigan City Council, nadaras a napili

VIGAN CITY – Saanen a naikkan ti presiding officer iti Sangguniang Panlungsod ditoy iti idauluan nga standing committee, kas paset ti naamendaran a probision ti Internal Rules and Procedures ti konseho iti naangay a session  itay Hulio 2.

Iti umuna a session ti SP, insingasing da Konsehal George Villanueva ken Konsehal Benjo Verzosa a saanen a maikkan ti vice mayor iti chairmanship iti aniaman nga standing committee.

Napag-aanamongan pay dagiti miembro ti konseho ti pannakabukel ti lima nga espesial a komite, kas iti committees on sisterhood, oversight, gender development, tricycle franchise, ken people’s law enforcement group.

Nadaras ti pannakapili ti chairman ti kada komite gapu ta kaaduan kadagitoy ti awan ti nangkontra. Nupay kasta, sumagmamano a konsehal ti nagbaliw ti idauluanna a komite.

Dagiti sumaganad dagiti nadumaduma nga standing committees ken dagiti chairman: Finance and Social Services – Kon. Loreto Quibilan; Women and Family Affairs – Kon. Lourdes Baquiran; Environment and Sustainable Development – Kon. Audie Agdamag; Youth and Sports Development – SK Federated President – Chrisdan Fieldad; Rules and Legal Matters ken Health –  Kon. Benjo Verzoza; Cooperative and Livelihood – Kon. Maximo Alvez; Public Safety and Order ken Revenues and Economic Enterprises – Kon. George Villanueva; Tourism, Education, ken Transportation and Public Utilities – Kon. Everine Molina; Agriculture ken Labor and Employment – Kon. Andres Adriatico; Market and Slaughter House ken Trade, Commerce and Industry –  Kon. Henry Formoso; Infrastructure and Public Utilities ken Games and Amusement – Kon. Hermenigildo Apelin; Barangay Affairs – ABC Federated President Constante Benzon.

Dagiti espesial a komite:

Sisterhood ken Tricycle Franchise – Vice Mayor Franz Ranches; Oversight Committee – Kon. George Villanueva; Gender Development -Kon. Lourdes Baquiran; PLEB – Kon. Everin Molina.

Dinawat ni Ranches kadagiti konsehal nga aramidenda amin ti kabaelanda nga agserbi iti siudad ken mangidaulo iti pagkomiteanda tapno  nasaysayaat met laeng ti panagpandayda iti linteg.