Charactonym (Maudi iti dua a paset)

Ta ania ngamin aya ti makunkuna a charactonym?

A charactonym is a name which suggests the personality traits of a fictional character. In other words, it is the name given to a literary character that especially fits his or her personality.

Ehemplo: Ni “Ciano Bassit” a sarita ni Martin Rochina ken nangabak iti makaparay-aw a sarita. Kampanerang Kuba. Siding Bulding. Lising Singkol. Boy Negro. Ken dadduma pay a karakter a no binasam ida ket ammomon wenno addan  pamalpalatpatam iti naigamer a kinaasinoda.

Idi damo, naruay ti charactonym. Ngem diak la ammo no apay a bimmattaway. Mabalin a nakita nga adu dagiti saan a mangayat a mangaramat iti deformity wenno depekto wenno naisalsalumina a langa wenno galad ti karakter ta ipatoda a panangibaba wenno pananglais ti pinartuat a karakter. Saanda a makita ti kinapintas daytoy ta ti sentro ti imatangda wenno kitkitaenda laeng ket dagiti nalaad a pasetna.

Ngem ania ngarud ti serbi ti redeeming quality ti maysa a karakter no saan nga ipakat daytoy? No adda  charactonym, adda met  redeeming quality a mangited iti balanse a panirigan kadagiti tumaud nga iray ken saan a nasayaat nga impression.

Ti redeeming quality ket panangpunno kadagiti nagkurangan; ti panangitag-ay ti asinoman a karakter a pinartuat iti laksid ti kinaadda ti pagkuranganna. Panangsubbot iti naiwawa a kababalin ken katatao daytoy a banag. Panangallangon.

Laglagipen koma nga adun dagiti naputar a karakter a kas maysa a charactonym. Kadagiti pelikula, iti man English ken iti Tagalog ken aniaman a lengguahe ket maus-usar ti charactonym. Adu pay dagiti nagbalin a bida.

No apay a nagbalin a naserioso dagiti rumrummuar a sarita-Iluko iti agdama ket pagarupek a maigapu iti pannakaidisso ti charactonym. Agpada a maaramat daytoy iti serioso a sarita ken iti makapakatawa. Ngem iti bukodko a panirigan, namaymayat met laeng no maaramat daytoy iti makaparay-aw a sarita. Nangnangruna la unay iti makaparay-aw wenno makapakatawa a sarita, ta kalpasan a binasa ti sinurat,  lumtuad ti garakgak, katawa wenno isem a di magalem.

No ngamin iti makaparay-aw a sarita ti pangaramatan, saan met nga usaren dagiti depekto a kas lais wenno panangibaba ti dayaw no di ket usaren a mangitag-ay iti personalidad ti karakter a pinarsua. Wenno usaren dagiti galad ti karakter a naisangsangayan iti amin. Dayta a galad ket itakderna ti kinaasino ti nadakamat.

Maaramat koma dagiti banag a pagkurangan a kas mangitag-ay ti personalidad a saan ket a pananglais. No maaramat man a pananglais, sumarunon dita ti redeeming quality. Uray kadagiti naserioso a sarita a pakausaran ti charactonym ket naynay a maaramat  ti panangsubbot ti kinaasino malaksid kadagiti karakter a saanen a pulos nga agbalbaliw agingga iti gibusna.

Sigsiggaanmi ti panagparang manen dagiti nababaked a charactonym…#