Chavit, agrehistro a botante iti Narvacan?

VIGAN CITY – Pakpakauna ti bakal iti politika ti dua a natenneb a politiko iti Narvacan ken iti Siudad ti Vigan?

Daytoy ti dakkel a saludsod dagiti dagiti political analyst kalpasan nga impalagid ni dati a Governor Luis “Chavit” Singson nga agrehistro iti ili ti Narvacan.

Saanen a ninayonan pay ni Singson no ania ti motibona no apay nga agrehistro iti Narvacan malaksid ti kinunana a tarigagayna ti tumulong kadagiti agnaed iti nasao nga ili.

Saanna met nga imbaga nga agkandidato iti aniaman a posision iti nadakamat nga ili.

Ngem kadagiti agan-analisar iti pul-oy iti politika iti probinsa, daytoy a waragawag ni Singson ket paripirip nga adda planona a mangsango kadagiti Zaragoza iti panagpipili inton Mayo 2016.

Nupay kasta, kinuna ti maysa a politiko nga adayo pay ti 2016, adu pay ti danum nga agayus iti sirok ti rangtay ti politika ket posible a saan a mapasamak dayta a panagbangga dagiti dua a teddek a politiko iti probinsia.#