Chavit, agsubli iti probinsia kas broadcaster

VIGAN CITY –  Nupay nagretiron iti politika, agsubli ni dati a Gov. Luis “Chavit” Singson iti probinsia ngem kas maysa a broadcaster.

Iti pannakiuman kenkuana ni Jun Ramos, anchorman iti DWRS, impakaammo ni Singson a panggepna ti agprograma iti Ilocos Sur Hotline tapno bantayanna dagiti reklamo dagiti kaprobinsiaanna ken sungbatanna dagiti alegasion dagiti nangdadael kenkuana iti napalabas nga eleksion.

Kinuna ni Singson nga ur-urayenna ti naan-anay a panagandar ti Channel 4 ket agsilponto daytoy nga estasion ken ti DWRS.

“Agprogramaakto iti DWRS tapno bantayantayo dagiti adu a reklamo dagiti tattao a saan a naasikaso idi,” kinuna ni Singson idinto a dinakamatna a tamingenna dagiti naipulpulong kenkuana mainaig kadagiti sumagmamano nga ahensia ti gobierno a kas iti Department of Education.

Kinuna ti dati a gobernador nga adu dagiti reklamo a dimmanon kenkuana mainaig kadagiti mapapati a  bangking iti panag-ranking dagiti opisial kadagiti maipuesto wenno maipromot iti puesto.

Dinakamat pay ni Singson ti maysa a padi a nangbabbabalaw kenkuana idi eleksion nupay saanen a nagkandidato.

Idi kaudian nga eleksion para iti lokal a posision, nupay saan a nagkandidato ti laklakay a Singson,  dagiti annakna ti inkandidatona para iti kinagobernador ken kinadiputado iti umuna a distrito ti probinsia.

Inluges ni Ryan Singson ni dati a Mayor ti Tagudin Roque Ablan, Jr. iti kinagobernador idinto nga inabak ni Ronald Singson ni Atty. Bertrand Baterina iti kinadiputado.

Kinuna ti laklakay a Singson nga idi binabbabalaw dagiti kritikona idi eleksion, saanna a sinungsungbatan ida  tapno saan a maagrabiado dagitoy agsipud ta isu ti gobernador.

“Ita ta saannakon a gobernador, sungbatak dagiti panangdaddadaelda kaniak,” kinuna ni Singson sana imbuelta a kitaennanto met amin a kakaso dagiti papadi “tapno saan laeng a datayo ti kitkitaenda…”

“Adu dagiti nasayaat a paditayo ngem adda met dagiti papadi a saan a padi…” kinuna ni Singson.

“Saan laeng a dayta, amin-amin a reklamo iti probinsiatayo, rebbengna nga ipulongyo ta rebiguarentayo,” kinuna pay ti gobernador.  #