Footer

Chavit, agtalinaed nga awan pay pakaikappenganna a partido

VIGAN CITY – Agtaltalinaed ni Governor elect Luis “Chavit” Singson nga awan pay ti pakaikappenganna a partido agingga a malpas ti konsultasionna kadagiti lokal nga opisial ditoy probinsia.

Daytoy ti imbatad ni Governor elect Luis “Chavit” Singson iti interbio kenkuana dagiti kameng ti media bayat ti selebrasion ti panagkasangayna idi Hunio 21.

“Nagikkatak iti LAKAS KAMPI CMD ken sinuportarak ni Manny Villar ngem saanak pay a nakialiado iti aniaman a partido politikal. Madama ti konsultasionmi kadagiti kakaduatayo no ania a partido ti kumappengantayo,” kinuna ni Singson idinto nga innayonna a  sisasagana a makitinnulong kadagiti proyekto nga isayangkat ni President elect Noynoy Aquino.

Ni Pres. Gloria Macapagal-Arroyo ti kangrunaan a bisita ni Singson iti kaaldawan ti panagkasangayna.

Naigiddan ti selebrasion ti kasangayna ti panagsapata amin a nangabak a lokal nga opisial ken ni Pres. Arroyo, pakairamanan da Vice Governor elect Deogracias Victor “DV” Savellano, Diputado Ronald Singson ti umuna a distrito, Eric Owen Singson ti maikadua a distrito, dagiti sangapulo a bokal, dagiti mayor, bise mayor ken kokonsehal iti tunggal ili.

Impannakkel ni Singson ken ni Pres. Arroyo a napintasen dagiti kalsada iti sibubukel a probinsia kangrunaanna iti maikadua a distrito ken iti umuli iti upland municipalities.

Inyangaw pay ni Singson a saanen a makutog ti Presidente no agdaliasat daytoy iti kalsada ti Ilocos Sur.

Maipalagip a sumagmamanon a tawen ti napalabas a panangpasiar ti Presidente iti rehion uno, nasinga ti pannaturogna iti uneg ti lugan gapu iti kinakutog ti daldalanenda a kalsada a naammuanna kalpasanna a paset ti maikadua a distrito ti Ilocos Sur. Dagus idi a pinaayabanna ti mangidaulo iti opisina ti DPWH a makinsakup iti kalsada.

Pinagyamanan pay ni Singson ti Presidente gapu ta 100% nga addan naipasdek a  Botika ng Barangay kadagiti 768 a barangay iti Ilocos Sur.

Kabayatanna, iti maysa a press conference nga inangay ni Singson iti pagtaenganna iti Baluarte ditoy siudad ti Vigan, impakaammona a maangay ti seremonia ti panaginnallawatda ken ni agdama a gobernador Savellano iti simboliko a tulbek ti probinsia inton Hulio 1, kagiddan ti panagbisita dagiti delegado manipud iti China iti Ilocos Sur.

Kinuna ni Singson nga  ipresentarto pay dagiti opisial ti Ilocos Sur ti insaganada a plano para iti sumaruno a lima a tawen kas pangawisda kadagiti chinese investors a mayat nga umay agipuonan iti probinsia.#