Footer

Chavit: Bigueno of the Year

Ni Gov. Luis “Chavit” Singson ti nakaiyawatan ti kangatuan a pammadayaw nga ited ti city government kadagiti maipagpannakkel nga umili daytoy a siudad ita a tawen.

Inawat ni Singson ti pammadayaw a Bigueño of the Year iti karabian ti Enero 25, piesta ti konbersion ni San Pablo, patron ditoy.

Daytoy ti umuna a gundaway a naiyawat ti pammadayaw iti maysa a politiko.

Kadagiti kallabes a tawen, naited daytoy a pammadayaw kada Dennis Rivas, negosiante; CJ Suarez, nagkampeon iti bowling iti sangalubongan; ken Maria Sumabat, retirado a mangisursuro iti University of the Philippines.

Indauluan ni Singson a napadayawan dagiti sumaganad: PO2 Amado Somera, Jr, outstanding police officer; JO2 Jerry Ragudo, outstanding jail officer; FO3 Nelson Piano, outstanding fireman; Editha Alinio, Camangaan Elem. School, outstanding teacher (Elem.); Jodeliza Refuerzo, Ilocos Sur National High School, outstanding teacher (Secondary); ken Mario Obrero, University of Northern Philippines, outstanding teacher (College).

Napadayawan pay ni Agapita Arce Vda. de Navarro, kaunaan a nagbayad iti buis ti daga; Ma. Socorro Villanueva, La Pacita Souvenir Shop, kaunaan a nangala iti business permit, kasta met dagiti 10 a negsio a kadakkelan ti binayadan a buis.

Itay Enero 22, immawat met iti plake ken cash award dagiti outstanding employees ti city government a pakairamanan da: Susan Ancheta, department head, Local Civil Registry Office; Edgar de la Cruz, division head; Teodoro Abellon, 1st level office personnel; Cesar Asperilla, 2nd level non-office; ken Jessie Pascua, traffic aide.

Tinawen nga ipapaay ti city government dagitoy a pammadayaw kas insentibo kadagiti  empleadona a nakaipaay iti napintas ken  pagwadan a serbsio kadagiti umili.