Footer

Chavit, imbilinna dagus pannakasolbar pannakapapatay barangay captain, polis

VIGAN CITY – Sumagmamano nga aldaw kalpasan ti shooting incident a nakapapatayan ti maysa a barangay captain ken maysa a polis iti makin-abagatan a paset ti kapitolio, pinaayaban ni Gov. Luis “Chavit” Singson ni PNP Provincial Director Police Senior Supt. Eduardo Dopale ken dagiti hepe ti polis ti amin nga ili idi Abril 16 tapno mapagpapatanganda ti linak ken talna iti probinsia.

Bayat ti dialogo, kinondena ti gobernador ti naladaw a panagresponde dagiti polis iti shooting incident agsipud ta saandan a  nakamakam dagiti kanayonan koma nga ebidensia iti pannakasolbar ti kaso kas iti mapapati a paltog dagiti kadua ti maysa kadagiti biktima a ni Daclapan Barangay Captain Wilfredo Terrago.

Nagudas ni Terrago ken ni SPO1 Rommel Rebuldela, PNP member a nakadestino iti Ilocos Sur Provincial Police Office, Bulag, Bantay, Ilocos Sur iti mapapati nga enkuentro a napasamak iti abagatanen a paset ti provincial capitol idi pasado alas dose ti malem ti Abril 11.

Nasugatan met babaen ti stray bullet ni Annabel Tabaniag y Almachar, 38, empleada ti Vigan City Hall a nairana nga adda iti asideg idi napasamak ti shooting incident.

Narelibo ni Police Supt. Elpidio Nartates, hepe ti polis ti Vigan City,  agsipud iti mapapati a pannakalabsing iti police integrated patrol system isu a napasamak ti pammaltog. (Naireport a nag-leave of absence ni Provincial Director Police Senior Supt.  Eduardo. -Ed)

Binabalaw pay ni Singson ti kinunana a saan a nainsiriban a pannakaisayangkat ti imbestigasion ta ti met bangkay ti immuna a tinaming dagiti polis imbes a ti mangsalikawkaw koma kadagiti posible a rimmuaran dagiti suspek.

“Adu dagiti rimmuar a saosao mainaig iti napasamak a nakairamanan pay a pannakatay ti maysa a polis isu a masapul ti nainget nga imbestigasion tapno masolbar ti kaso,” kinuna ti gobernador.

Inkalikagum ni Singson ti naing-inget pay a panagpatrolia dagiti polis kadagiti lugar a pagaaduan iti tao kasta metten a kiniddawna iti provincial director nga agsanay dagiti polis iti umno a panagimbestiga tapno malapdan ti panagadu dagiti unsolved cases idinto nga immandarna ti direkta a panagreport kenkuana dagiti hepe ti tunggal ili kasta metten ti linawas a pannakaipaay ti written report iti opisinana tunggal lawas.

“Ingetanyo pay ti panagrikisayo kadagiti checkpoints aglalo kadagiti makahelmet…” impaganetget ti gobernador idinto nga impakdaarna a maparitanen dagiti motorista nga aghelmet a sumrek iti siudad ti Vigan.

“Kababain daytoy a pasamak ket saantayo a makaawis iti adu a turista no saantayo a mapagtalinaed ti linak ken talna iti probinsiatayo,” kinuna pay ni Singson.

Imballaag pay ti gobernador a madagdagus ti pannakarelibo ti hepe ti polis a saan a makabael a mamagtalinaed iti seguridad iti masakupanna.#